Portada Turismu Les oficines de turismu siguen ensin información frente a los osos

Les oficines de turismu siguen ensin información frente a los osos

by redacción asturnews
Foto: M.Campo (https://www.flickr.com/photos/cibercorsario/)

Les oficines de turismu siguen ensin información frente a los osos y esti mes, la Fundación Oso Pardo vieno acabante refugar l’alarmismu sobre los ataques al ganáu y apunta que los animales tienen alimentu abondo nel monte.

Asturies tien más d’una docena de conceyos nos que la presencia del osu ye cada vegada más notable. Tal ye asina que munchos ganaderos alverten de que s’averen a les zones habitaes y causen importantes estroces, cuando non la muerte de ganáu. Tamién crez l’interés del públicu por contemplar estos animales en plena naturaleza, una práctica que, si nun se realiza correchamente, puede resultar peligrosa.

El Ministeriu d’Agricultura y Pesca, Alimentación y Medio Ambiente trata de regular estes práctiques y el pasáu mes d’abril presentó la guía ‘Bones práctiques pa la observación d’osu, llobu y llobu cerval n’España’. Pero’l problema ye que dicha publicación nun llegó a los sos potenciales destinatarios, como pueden ser los centros d’información turística de los conceyos oseros. Na Casa del Osu, en Proaza, nun dan nengún tipu d’encamientu a los visitantes comenenciudos en reparar a los plantígrados. «Solo dicímos-yos que diendo pelos senderos establecíos nun hai problemes», indiquen dende’l centru. Daqué similar asocede n’otres oficines de turismu, como pueden ser les de Cangas, Belmonte y Quirós. En toes dan-yos unes instrucciones básiques como «nun glayar, nun correr y caltener l’aselu», indiquen los sos responsables, pero echen de menos cuntar con dalguna publicación que-yos dexe tresmitir una información más completa a los visitantes.

Y ye que’l ministeriu non solo publicó la mentada guía, sinón que tamién ellaboró un trípticu colos diez principales conseyos qu’han de siguir toos aquellos que quieran reparar animales selvaxes o, a cencielles, que los atopen de manera inesperada. El problema ye qu’esi trípticu tampoco foi distribuyíu. Eso sí, dambes publicaciones atópense disponibles nel sitiu d’internet del ministeriu. Esos encamientos básicos son sencielles, como respetar tanto la normativa como a los animales selvaxes y a los habitantes de la zona, portase afechiscamente y poner en conocencia de les autoridaes comportamientos que supongan riesgu, conocer les formes de vida locales, nun desvelar l’allugamientu concretu de los animales, nun alterialos de forma apostada, cuntar con guíes profesionales y, en casu d’atopase con un osu, actuar ensin brusquedá, dexando que l’animal puedan retirase con tranquilidá.

Tamién te podria gustar