Les muyeres del Arte y la Cultura protagonizaron l’actu institucional n’Uviéu

La plaza del Conceyu acoyó esti  l’actu institucional del Conceyu d’Uviéu con motivu del 25 de Payares, Día Internacional pa la Eliminación de la violencia escontra les muyeres.

La corporación municipal, encabezada pol alcalde, Wenceslao López, acompañó, nos balcones del Consistoriu, a Vanesa Gutiérrez, poetisa, en representación de les muyeres de Lletres; Mabel Llavandera, artista plástica y autora del cartelu del 25N d’Uviéu, representando a les artes plástiques y a Marisa Valle Roso qu’estrenó’l so cantar “Títere o esclava”, escrita espresamente en recibiendo la invitación del Conceyu a participar nesti actu.

Al empiezu del actu la conceyala d’Atención a les Persones ya Igualdá, Marisa Ponga aseguró que “la violencia machista envilez la nuesa sociedá. Ye xera obligada lluchar ensin fuelgu por acabar con esta lacra. Gracies a les muyeres de la Cultura que güei nos acompañen y que representen a tantes otres callaes mientres sieglos. Quiero rindir homenaxe a toles muyeres, neñes y neños, víctimes de la violencia machista. La so memoria oblíganos a nun baxar la guardia. El lema d’anguaño asina nos lo recuerda. Les muyeres –y cito a Rosa de Luxemburgu- nun vamos ser dafechu iguales mientres nos sigan asesinando pol fechu de ser muyeres. Animo a tolos homes y muyeres d’Uviéu a lluchar contra la violencia machista. Creo que toos compartís la necesidá de trabayar xuntos contra esta lacra. Vives y llibres, toes!!” .
De siguío Marisa Valle Roso interpretó “Ella solo supo dexase querer” de Víctor Manuel y “una de les nueses escritores más potentes” –asina la definió la presentadora, Sonia Fidalgo- Vanesa Gutiérrez, punxo a munches muyeres lleendo un fragmentu de la novela “’La hestoria d’amor del sieglu’ que fala de la relación tóxico y violento hasta’l final de la so escritora”.

Mientres l’actu, amenizáu pola Banda de la Escuela Municipal de Música, dirixida por Jesús Alberto ‘Pacheco’, Amnistía Internacional realizó una performance sol lema Yá ye hora de que me creas nel que se denuncia que los derechos de les muyeres y neñes víctimes de violencia sexual n’España nun tán garantizaos. El percorríu, pola plaza del Conceyu sirvió pa visibilizar la realidá que sufren munches muyeres como ‘Blanca’ (nome ficticiu), víctima de la violencia machista. L’actu institucional tamién cuntó con intervención d’Amanda Vanesa (Secretariáu Xitanu) en representación del Conseyu Municipal d’Igualdá.

Marisa Valle Roso salió de nuevu al balcón para interpretar, “Títere o esclava”, unu cantar compuestu espresamente pal actu que, según dixo, “quixi escribir pa sentime bien y da-y voz a eses muyeres que son callaes y que nun se-yos cree cuando son valientes y denuncien”

L’Alcalde cerró l’actu estimando la presencia de toos y toes, “anguaño quixímos que la Cultura en femenín sía la protagonista pa impulsar la imaxe de les muyeres (…) nun día como güei la nuesa primer alcordanza debe de ser pa elles. No que va d’añu fueron asesinaes 44 muyeres y vaisme a dexar que recuerde a les nueses asturianes asesinaes, Paz, Isabel y Yesica. La nuesa esmolición tien que ser continua. El pasu 8 de marzu esti país vivió un acontecimientu históricu: millones de muyeres esixistis nes cais lo que por derechu vos pertenez: La igualdá real. Siéntome arguyosu de ser l’Alcalde d’una ciudá na que toos lluchamos por ser meyores. Dende equí quiero reafitar l’absolutu compromisu d’esti Conceyu para faer realidá les polítiques d’Igualdá. La cultura ye la nuesa arma pa lluchar contra’l machista”. Y López cerró la so intervención lleendo’l poema de Berta Piñán, “La casa”.