Les Medayes de Plata d’Uviéu van a la Real Banda de Gaites, la Banda de Música y al Concursu y Amuesa de Folclore “Ciudá d’Uviéu”

Les Medayes de Plata d’Uviéu van a la Real Banda de Gaites, la Banda de Música y al Concursu y Amuesa de Folclore “Ciudá d’Uviéu”
12 xunu 12:56 2017 Imprimir

Trés plenos estraordinarios y los trés por unanimidá foron necesarios pa conceder la Medaya de Plata de la ciudá a la Real Banda de Gaites, la Banda de Música y l’Amuesa de Folclore “Ciudá d’Uviéu”. 

El salón de plenos del Conceyu acoyó esta selmana pasada trés sesiones estraordinaries nun mesmu día pa conceder estos honores y distinciones municipales. Nel primer plenu’l secretariu recordó la trayectoria de la Real Banda de Gaites ‘Ciudad d’Uviéu’, una formación qu’empezó la so andadura en 1992 y qu’anguaño celebra la so 25 aniversariu, presidida dende los sos empiezos por Adolfo García Blanco y que la so actividá na capital asturiana, nel Principáu, n’España y n’otros llugares del mundu ye güei incuestionable. El profesoráu ta compuestu por Vicente Prado Suárez “El Pravianu”, Yolanda Pérez Alonso, “Yoly”, que ye profesora d’acordión, y José Manuel Fernández Gutiérrez, “Guti”, que ye’l primer director de la Banda.

La Banda de Gaites “Ciudad d’Uviéu”, como banda municipal, ufierta principalmente espectáculos n’Uviéu y amás del espardimientu de la música tradicional asturiana, unu de los sos principales oxetivos ye participar viviegamente na vida y eventos del conceyu. “Hai munches solicitúes riquiendo la presencia de la Banda. De toes elles, realícense aprosimao 130 actuaciones al añu, siendo los principales destinos, los pueblos y barrios d’Uviéu. Tamién hai que destacar la so participación nos actos más relevantes de la nuesa ciudá. Llogró un gran ésitu na Cabalgata de los Reis Magos, el desfile del Día d’América n’Asturies, y la so actuación na Ceremonia d’Entrega de los Premios Princesa d’Asturies, que dexa casi ensin respiración a mediu Mundu”, lleó’l secretariu. “La gran cantidá d’actuaciones acumulaes pola agrupación fai qu’en 1999 naza la Banda de Gaites Vetusta, cola peculiaridá de que tolos sos componentes son menores de dieciocho años. Yá dende los sos empiezos la proyección de los gaiteros uvieinos trespasa fronteres. Los ecos de la banda de la capital tescienden non yá na ciudá y diversos puntos d’Asturies, sinón que l’agrupación foi aplaudida en distintos actos y ciudaes españoles”.

La segunda de les sesiones plenaries sirvió pa conceder, tamién por unanimidá, la Medaya de Plata a la Banda de Música “Ciudá d’Uviéu”. Esta formación fixo la so apaición nel Desfile del Día d’América n’Asturies del añu 1992, y el so primer conciertu ufiertar a otru día nel Bombé del Campu San Francisco. N’avientu de 1995 graba’l so primer discu, presentándolo al públicu nun conciertu nel Teatru Campoamor en febreru de 1996. N’abril de 1997 l’agrupación graba’l so segundu discu, dedicáu a la Zarzuela; nel añu 1999, gracies a la collaboración de R.T.V.Y. y el Conceyu d’Uviéu, graba’l so tercer discu tituláu “Al son d’España”, toos ellos so la batuta del so director titular D. Francisco Vigil. Nel añu 2013 sale a la lluz el so cuartu discu, de música asturiana, patrocináu pol Bancu de Sabadell-Herrero, y que tuvo como técnicu de soníu al solista de percusión de la orquesta Uviéu Filarmonía Fernando Arias. Esti discu ye de música asturiana, y nél cuntó cola collaboración de la Capiya Polifónica Ciudá d’Uviéu. Mientres los años 2008 a 2010 el so director foi David Coláu Corones, mozu músicu asturianu, venceyáu a la Banda de Música Ciudá d’Uviéu dende la so creación, como componente de la mesma y subdireutor. Anguaño’l so director titular ye Francisco Vigil Sampedro, que tuvo amestáu la formación dende la creación.

Nel tercer plenu estraordinariu, la Corporación aprobó tamién por unanimidá la concesión de la Medaya de Plata de la Ciudá al Concursu y Amuesa de Folclore “Ciudá d’Uviéu”, tamién nacíu en 1992. El secretariu empezó la llectura de la propuesta del edil de Cultura recordando “l’añu 1922 fecha na qu’Uviéu acoyó’l primer festival de música na plaza de toros. Setenta años más tarde naz esti certame movíu pola defensa y los  valores de la música asturiana. L’entós alcalde d’Uviéu, Gabino de Lorenzo, encarga a Carlos Jeannot la organización y el desenvolvimientu d’esti certame, con see nel Teatru Campoamor y, anguaño, na Filarmónica”.

  Categories: