Portada Conceyos Les fiestes del Carme Caldones arranquen con un alderique sol baille tradicional

Les fiestes del Carme Caldones arranquen con un alderique sol baille tradicional

by redacción asturnews
Cartelu de la primer edición

Esti vienres 15 de xunetu, la comisión de fiestes La Rebollada entama les fiestes del Carme de Caldones y como ye vezu, la romería arrancará col V Refaciendo Tradiciones, una candonga d’un día dedicada la revitalización y los curiaos de delles tradiciones en Caldones.

La corta y plantáu del arbolón, la foguera y la nueche en danza son les principales señes d’identidá del primer día de fiesta nesta collación rural del conceyu Xixón, asitiada nel Valle Altu’l Ríu Muriel y l’arbolón d’esti añu ta donáu por Marina’l Mecheru, de la casería Casa Ramirín, y el pregón darálu’l yerbatu Ánxel Antón García, mayestru rural nel Valle Altu’l Ríu Muriel.

Como novedá de la quinta edición, recupérase l’alderique sol baille tradicional que se ficiera de mou esperimental en 2012, n’aquel momentu embaxo’l títulu «Conxusta al rodiu’l baille nel folk asturianu», y nel que participaron dell·s músic·s del folk asturianu. Nesta ocasión, la temática ye «Alderique sol estáu de la cuestión del baille tradicional n’Asturies: desfolklorización, perspectives de futuru» y participarán persones venceyaes a diferentes concepciones del baille tradicional. L’alderique arrancará a les 17 hores y va ser abiertu a tola xente que quiera participar n’él. Entamarán la conversación Yolanda Cerra Bada, Xosé Antón Martínez «Ambás», Aida Mariño, Paulino Santirso y Rodrigo Cuevas.

Paralelamente, a lo llargo la tarde tendrán llugar más actividades. Ente elles, a les 17 hores, el taller de cómo facer una vara yerba y el concursu de sidra casero. A les 20 hores, como ye vezu, tendrá llugar el taller d’aniciu al baille tradicional qu’impartirá Ramsés Ilesies. Y a partir de les 21 hores, tola xente’l prau que lo tenga a bien collaborará plantando l’arbolón. Al oscurecer, Ánxel Antón García, que fuera mayestru nel colexu Vega y de munchxs escolinxs del Valle Altu’l Ríu Muriel, va dar el pregón d’arranque de la fiesta. De secute, prenderase la foguera, armarase una danza y entamará la V Nueche en Danza de Caldones, na que, como siempre, habrá escenariu abiertu, amás de la participarán de los grupos L’Andecha Turcipié y Cantaruxare Pandereteros.

El día anterior a la fiesta, el xueves 14, los mozos y moces del pueblu van trabayar en man común na corta l’arbolón d’esti añu, donáu por Marina’l Mecheru, de la casería Casa Ramirín. La actividá ye abierta a toles persones que quieran andechar con nós o, simplemente, dir velo y echar un culín. Entamará a les 17 hores nel llugar d’El Reburiu (Barriu de Garbelles, Caldones).

Tamién te podria gustar