Les Feries de 2015 van tener L.lenizu y L.leniza

El Conceyu de L.lena al traviés de l’área de Mocedá vieno acabante de convocar el Galardón de “L.lenizu y L.leniza de les Feries 2015” al envís d’escoyer al mozu y moza, de 14 a 17 años, que más orixinal resuelva, y más y meyores cualidaes demuestren en delles pruebes.

Les bases pa participar van poer consultase na Oficina d’Información Xuvenil “Juvelena” y la entrega del premiu, va tener llugar nel Polideportivu del Colexu Jesús Neira, el Domingu 11 d’Ochobre a les 18 hores. La noticia dábase a conocer esyti día en rueda de prensa pola conceyala de Festexos, Pamela de la Fonte, al tiempu que facía l’anuncia de que Dark la eme va lleer el pregón de les Feries.

MC, DJ, productor, llocutor y músicu, Mario Fueyo, conocíu como Dark la eme, va ser l’encargáu de lleer el pregón de Les Feries, nun actu que se va celebrar nel teatru Vital Aza’l xueves día 8 d’ochobre a les 8 de la tarde.

Fueyo foi’l primeru en publicar un cd de Hip Hop n’Asturies. Lleva dende los 16 años nos escenarios y cultivó tolos estilos, dende’l folk, rock, jazz, heavy, reggae. A los 14 años empezó a faer radio nel taller de la emisora local. y agora tien un programa de radiu na RPA.

Ún de los sos cantares, ‘Un asturianu en Madrid’ del so discu ‘Chigre y Dragón’ foi una versión que recibió’l vistu bonu de Sting. Anguaño tien seis trabayos nel mercáu, el postreru ‘L’antroxu que llevo per fora’ de 2011, a lo qu’hai que sumar les sos perabondoses collaboraciones.

La conceyala de Festexos, Pamela de la Fonte, esplicó na rueda de prensa que “pensamos en Mario Fueyo dende’l primer momentu como pregoneru, y tuvimos la suerte de qu’aceutara”. De la Fonte, tuvo acompañada pola conceyala responsable de l’área de Mocedá, Rosa Morán, pa presentar la nueva iniciativa del L.lanicu y L.laniza de les Feries que se va incluyir nel programa de les fiestes.