Les clases de segundu de Bachilleratu van rematar el 11 de mayu

El fin del periodu llectivu palos alumnos de segundu de Bachilleratu yá tien fecha. El 11 de mayu ye l’últimu día que los estudiantes van dir a les clases dientro del horariu habitual n’Asturies.

La noticia conocíase esta selamana na que tamién sabía l’alumnáu y  el profesoráu que les sesiones d’evaluación final van desenvolvese los díes 14 y 15 d’esi mesmu mes y les pruebes estraordinaries quedaron afitaes para los díes 12 y 13 de xunu. Los datos yeren desplicaos pola Conseyería d’Educación nuna circular na qu’afaya’l calendariu a les feches nes que se va desenvolver la EBAU, la prueba d’accesu a la Universidá, que va ser, pa quien superen el cursu na convocatoria ordinaria, los díes 5, 6 y 7 de xunu. Y palos que vaigan a la convocatoria estraordinaria, el 3, 4 y 5 de xunetu.

Asina, les clases para preparar la convocatoria ordinaria de la Evaluación de Bachilleratu d’Accesu a la Universidá van desenvolvese del 17 de mayu al 4 de xunu, dambos incluyíos, y va dexase que tol alumnáu puea allegar a les mesmes. L’actividá docente, sicasí, palos estudiantes que tengan de presentase a la convocatoria estraordinaria va prosiguir ente los díes 17 de mayu y 25 de xunu. Va Corresponder al equipu directivu de cada centru l’ellaborar el calendariu de toles actividaes d’esti final de cursu con vistes a la celebración de la Evaluación de Bachilleratu d’Accesu a la Universidá.