Portada Educación Les certificaciones oficiales d’asturianu entamarán esti 2019

Les certificaciones oficiales d’asturianu entamarán esti 2019

by redacción asturnews

El Conseyu de Gobiernu del Principaú vieno acabante de dar vía llibre al decretu qu’afita los niveles de competencia del Marcue Européu de les Llingües nel usu de la llingua asturiana. Dende esti 2019, los asturianofalantes van poer certificar cinco niveles: el básicu A1, el básicu A2, l’intermediu B1, l’intermediu B2 y l’avanzáu C1.

La normativa qu’aprobara esti vienres el Conseyu de Gobiernu, na so cabera xunta del mandatu, desarrolla la Llei d’Usu y Promoción del Bable/Asturianu, que nel so artículu 11 dispón les certificaciones qu’acreiten el conocimientu d’esta llingua. La norma regula les pruebes de certificación correspondientes que tuvieron en información pública en dos ocasiones, por un error nel testu, qu’obligó a repetir el periodu de consultes.

L’accesu a estos exames va producise per primera vegada nel próximu cursu, si se cumplen los plazos anunciaos nel so día, y va dexar l’accesu al certificáu correspondiente. L’alministración garantizará que les pruebes seguirán unos estándares que garanticen la so validez, fiabiliad, viabilidá, equidá ya impactu positivu.

La conseyería va ellaborar una guía informativa con tolos datos necesarios y cola normativa, de forma que cada exame de tolos niveles va incluyir actividaes de comprensión de testos orales y escritos, de producción y coproducción de testos orales y escritos y de mediación. Los exames van ser comunes en tol Principáu y caúna de les partes va ser sopesada col mesmu valor. esto ye, un quintu de la puntuación total.

Pa superar con ésitu’l certificáu la puntuación múnima va ser de 60 sobro 100 y en caúna de les partes va tenese qu’algamar, siquier, un 50 sobro 100. Les partes que van midir la compresión de testos orales y escritos van tener qu’incluyir dos xeres distintes. y el númberu mínimu de items a valorar va ser de 25.

La Conseyería d’Educación, tomando como referencia’l decretu, va tener qu’ellaborar un documentu nel qu’especifique tolo tocante al exame y al procesu d’evaluación. Asina, describirase puntuación de cada prueba, la duración, la descripción de los test, les característiques que van tener los testos escritu y oral, el grau de complexidá, la duración de les grabaciones,…

Agora, la Conseyería d’Educación tendrá de nomar comisiones evaluadores compuestes por un mínimu de trés funcionarios de carrera de los cuerpos de catedráticos y profesores de Secundaria o del cuerpu de catedráticos y profesores de les escueles oficiales d’idiomes. Los requisitos imprescindibles son que formen parte del rexistru xeneral de capacitación del bable asturianu y Gallego/asturianu, que sían llicenciaos o graduaos en Filoloxía y, amás, disponer del títulu d’especialista universitariu de Filoloxía Asturiana o bien del máster de Formación del Profesoráu de Secundaria, na especialidá de llingua asturiana. Una vegada que s’empiecen a expedir los certificaos de nivel, van poder aportar a los puestos de los exames los docentes que consigan el B2 o’l C1 en conocencia de la llingua asturiana.

Tamién te podria gustar