Les bodes n’Avilés yá son tamién n’asturianu

El conceyu d’Avilés, gracies a la presencia de l’agrupación d’electores Somos, sigue averándose pasín a pasu a la normalidá llingüística, como amuesa’l fechu de qu’entamen a celebrase bodes en llingua asturiana na Casa Conceyu.

Nuna nota de prensa asoleyada esti día, facía esta anuncia’l grupu municipal de Somos, al tiempu que facía alcordanza de que tien “como ún de los sos oxetivos nesta materia qu’al final de la llexislatura la convivencia ente l’asturianu y el castellanu seya dalgo natural y avezao nuna sociedá tan particular como l’avilesina, dao l’orixe de bona parte de la so población”.

Nesti sen, el pasáu sábadu’l conceyal Xune Elipe “celebraba la primer boda n’asturianu del conceyu, facíalo delantre de más de cien convidaos qu’acoyeron les palabres na nuestra llingua con satisfacción y empatía, como asina-y fixeron saber”. Los novios, non venceyaos al movimientu de reivindicación llingüística, tamién asumieron con naturalidá’l fechu de que la boda se desenvolviere n’asturianu. L’oficiante, a mou d’introducción, “pronunció unes palabres de bienvenida a los asistentes y lleó dellos testos que reflexonaben alredor de lo que significaba l’actu que diben facer, p’acabar recitando los versos del cantar de Dixebra «Vientu na cara». Darréu d’ello pasóse al testu oficial y obligatoriu, preceptivu pa da-y validez llegal al casoriu, traducíu tamién al asturianu”.

El Conceyu d’Avilés tien dellos protocolos pa oficiar esti tipu de ceremonies, toos en castellanu, pero “a partir d’agora aquellos qu’asina lo quieran van poder escoyer tamién la opción en llingua asturiana, yá que Somos Avilés ufierta al restu de la Corporación esta versión cuando los contrayentes lo soliciten”. De fechu, el próximu sábadu, otra vuelta, va poder sentise la llingua asturiana nuna ceremonia d’esti calter, al pidilo la pareya de novios.