Les biblioteques d’Uviéu salen a la cai pel branu

Les biblioteques d’Uviéu salen a la cai pel branu
21 agostu 10:13 2017 Imprimir

Una cita a palpu con una escritora, presentaciones lliteraries y actividaes infantiles van enllenar les tardes d’agostu y setiembre en places como Porlier, el Conceyín o’l Milán, desqu’esti xueves pasáu, de 19 a 22.00 hores, na plaza Porlier, sol títulu “Danos una palabra y te regalamos un poema” entamaron les actividaes de la mano del nuevu escritor madrilanu Pablo Urizal.

La Rede municipal de biblioteques d’Uviéu, dependiente de la Conceyalía d’Educación del Conceyu d’Uviéu, van desenvolver a lo llargo d’esti mes d’agostu y l’entrante de setiembre una intensa actividá a cuerpu de cai, cola fin d’averase a los llugares d’esparcimientu más frecuentaos pola ciudadanía, como pueden ser parques, y places. Chelo Veiga, la nueva coordinadora de la Rede dende’l pasáu mes de xunetu, diseñó un programa d’actividaes para los meses d’agostu y setiembre en coordinación cola concejala de la área d’Educación, Mercedes González. El programa d’actividaes cunta cola collaboración de l’Asociación de Llibreros d’Uviéu.

“La idea ye dir a más y para el próximu branu, yá con tiempu, diseñar un programa más ampliu y que tome tol branu”, esplicó Mercedes González esta mañana en rueda de prensa, onde aprovechó para felicitar a Chelo Veiga, con una llarga esperiencia nes biblioteques uvieines, pol so trabayu y dedicación: “Felicito a Chelo y a tolos compañeros y compañeres bibliotecaries pol so llabor. Vamos Dir avanzando cola suma de toos y l’implicación de toles biblioteques”, añedió. “Como anguaño yá nun da tiempu pa pensar nun programa más ambiciosu, pensemos que podía faese dalguna actividá na cai ensin que suponga una escesiva carga de trabayu para’l personal, como ye sabíu, bien escasu nes biblioteques”, manifestó, pela so parte, Chelo Veiga demientres la presentación de les actividaes.

“Palabres que faen ciudá, palabres que faen vida” ye’l nome de la siguiente de les actividaes veraniegues de la Rede municipal de biblioteques. Va Consistir nuna presentación de les obres del profesor y escritor sevillanu Tirso Vallecillos. L’autor va traer a Uviéu’l so llibru d’aforismos “Homo Pokémons. Aliendos, malalientos y otros tafaríos”; el llibru de poemes “Subway”; y el llibru de relatos curtios “Llibru de cocina tradicional caníbal”. Esta actividá va tener llugar el día 24 d’agostu na plaza del Conceyín de La Corredoria a les 19.00 hores y va cuntar cola presencia del autor, que va arreyar a los asistentes na obra, poemes y aforismos.

El programa tamién inclúi la orixinal actividá “Cita lliteraria a palpu ¿realmente hai llibros para’l branu?”, que pretende motivar a les persones por qu’intenten pescudar con qué escritora pueden caltener un alcuentru y compartir conversación sobro lliteratura nuna plaza de la ciudá. Nes redes sociales del Conceyu d’Uviéu dirán ufiertándose pistes sobro la so vida y la so obra. Finalmente, l’alcuentru cola escritora sorpresa va tener llugar na plaza del Milán el 30 d’agostu.

Amás, la biblioteca de La Granxa va acoyer el 6 de setiembre la presentación del llibru sobro arte “Uviéu”, de Fermín Santos López. A lo último, El Paséu del Bombé del Campu San Francisco va acoyer sesiones de cuenta cuentos y maxa en septiembre, a cargu del magu Julianini.

Loading Facebook Comments ...