Les bandes de música d’Avilés y de Pravia toquen el sábadu na plaza d’España

Les bandes de música d’Avilés y de Pravia toquen el sábadu na plaza d’España
24 agostu 11:19 2018 Imprimir

Les bandes de música d’Avilés y de Pravia toquen na plaza d’España aconceyando a un barganal de 70 músicos sobro l’escenariu a partir de les 13 hores. Tratase del cuartu hermanamiento musical qu’entama l’agrupación avilesina. Antes de l’actuación, a les 12 hores, van ser recibíes nel conceyu pola concejala de Cultura y van realizar un pasacalles.

Un añu más, algamando la so cuarta edición, la Banda de Música d’Avilés celebra un  nuevu Hermanamiento Musical. Nesta ocasión, l’agrupación convidada va ser la Banda de Música de Pravia. Dambes formaciones musicales van ufiertar un conciertu pasao mañana, sábadu, na plaza d’España d’Avilés a partir de les 13 hores.

Antes del conciertu, a les 12 hores, va tener llugar un actu d’acoyida oficial, nel Salón de Recepciones del Conceyu que va presidir la concejala de Cultura, Yolanda Alonso. Amás, dambes agrupaciones van enllenar de música la ciudá, nun pasacalles col van percorrer el centru d’Avilés.

El programa d’actuaciones de la Banda de Música d’Avilés pel branu remata con esti hermanamientu, qu’empieza a convertise en tradicional parte de les Fiestes de San Agustín. L’agrupación avilesina, dirixida por Daniel Santos, va cuntar cola collaboración de miembros de la Banda de Gaites d’Avilés. La Banda de Pravia, que dirixe Tinu Cuesta, tien nes sos files la so propia sección del preséu tradicional

En total, van participar cerca de 70 músicos, superando caúna de la bandes la trentena d’integrantes. La duración averada del conciertu va ser d’una hora. El programa inclúi un menú capaz de satisfaer tolos gustos musicales, nun amiestu de clásicos contemporaneos con otros más tradicionales del repertoriu de les bandes. Ye’l siguiente:

Banda de música de Pravia

“Can you dig it?” De Brian Tyler, con arreglos de Tinu Cuesta.
“Conciertu d’Aranxuez”. De Joaquín Rodrigo, en versión de Herb Alpert, con arreglos de Tinu Cuesta.
“La máquina d’escribir”. De Leroy Anderson, con arreglos de Tinu Cuesta.
“Set-enteru”. Con arreglos de Llariego.

Banda de música d’Avilés

“Queen in concert”. Arreglos de Jay Bocook.
“Granada”. D’Agustín Lara, con arreglos de Kazuhiro Morita.
“Polka Chaciana”. Con arreglos de Daniel Santos.
“Muñeira Tormaelo”. Con arreglos de Daniel Santos.

La Banda de Música d’Avilés, que celebró en 2015 la so 125 aniversariu, cuenta con cerca d’una trentena músicos permanentes de toles edaes, dende neños hasta adultos. Nació por alcuerdu plenariu’l 22 d’ochobre de 1890 siendo alcalde Atanasio Carreño. L’agrupación, presidida por Elena Muñoz, y con Daniel Santos a la batuta, punxo música a los actos más importantes que se celebraron na ciudá.

La Banda de Música de Pravia, que cumplió en 2014 el so primer sieglu de vida, renació pal escenariu nel añu 2011, tres un impás de disolución nos añu 90, gracies al impulsu del que güei sigue siendo’l so director, Tinu Cuesta, y presidida por Fernando Prieto. Con una trentena d’integrantes, una de les sos peculiaridaes ye cuntar con una sección específica de música de gaita, averándola a la música de raigañu asturianu.

  Categories: