Les autoridaes españoles mintieron sobre la situación de la llingua asturiana

“Les autoridaes españoles mintieron sobre la situación de la llingua asturiana” según l’Aconceyamientu de Xuristes pol Asturianu qu’ayeri facía públicu un comunicáu nel qu’afitaba que “nos parágrafos 87 a 90 (páxines 14 y 15 de la versión en castellán del informe sobre’l cumplimientu de la Carta Europea de les Llingües Rexonales o Minoritaries, el Conseyu d’Europa esclaria que’l so Comité d’Espertos yá soñillare “qu’había una resquiebra ente la gran demanda social… y el fechu de que la llingua asturiana entá nun tuviere’l reconocimientu de cooficialidá”, a lo que les autoridaes españoles informaron que la non reconocencia de la cooficialidá del asturianu debíase a la so”falta de normalización y de una lliteratura escrita afayadiza” na nuesa llingua.

Por embargu, diz el Conseyu d’Europa, “dementres la visita nel territoriu, informóse’l Comité d’Espertos que l’Academia de la Llingua Asturiana… tenía finada la versión normalizada de la llingua (diccionariu, gramática, nomenclatura de los topónimos)” y tamién qu’hai consensu social sobro l’emplegu de la llingua (el 60% de la polación ta a favor de la cooficialidá; de que la llingua tenga mayor presencia nos medios de comunicación; y de que s’ufierte en tolos niveles d’enseñanza).

Poro, l’Aconceyamientu de Xuristes pol Asturianu va empobinase al Gobiernu Español pa desixí-y qu’esclarie a la ciudadanía asturiana, en particular, y a la española, en xeneral, por qué mintió énte’l Conseyu d’Europa y si esti actu foi o non inducíu pol Gobiernu d’Areces.

Tamién-y entrugará al Gobiernu Español cómo y cuándo va cumplir la desixencia (“recomendación” nel llinguax diplomáticu), contenía na resolución 4 del Comité de Ministros del Conseyu d’Europa y empobinada a que “les autoridaes esaminen, en collaboración colos falantes asturianos, la posibilidá de meyorar el raseru de proteición qu’anguañu ufre l’Estatutu d’Autonomía a la llingua asturiana”.