Portada Educación Les Asamblees d’estudiantes conderguen les declaciones xenófobes de Miguel Alarcos

Les Asamblees d’estudiantes conderguen les declaciones xenófobes de Miguel Alarcos

by redacción asturnews
Paraninfu de la Universidá d'Uviñeu

Les y los estudiantes de la Universidá d’Uviéu siéntense ofendíos poles actitúes y opiniones clasistes y xenófobes calteníes nos díes caberos por Miguel Alarcos.

Nun comunicáu asoleyúa esti vienres, afiten que nun “ye solo que les sos palabres y opiniones vaigan escontra l’articulu 2 de la Declaración Universal de los Derechos Humanos, asina como escontra l’Artículu 4 de la Llei 1/98 d’Usu del asturianu, que contravengan los oxetivos de promoción de la llingua asturiana recoyíos nel artículu 6 de los Estatutos de la nuesa universidá, que falten al respetu de los miles d’asturianos y asturianes qu’emplegamos como llingua materna o vehicular l’asturianu y a toes aquelles persones que queremos defender la bayura y patrimoniu cultural de la nuesa tierra; ye que lo fai dende’l púlpitu que la sociedá asturiana-y empresta como docente universitariu”.

Amás creen que namái “un ignorante con fondos sentimientos d’odiu puede llamar “paletu” a daquién por utilizar una llingua, creyéndose superior. Ye repugnante que tilde la llingua de “puta mentira que s’aprovecha de la xente de bien” y qu’espublice abiertamente que va ser intolerante con ella y pretenda prohibir en nengún espaciu la defensa y usu de la llingua. Al contrariu qu’esti personaxe, nós tamos arguyoses de la cultura de la que formamos parte y de defender una Universidá d’Uviéu que funda los sos raigaños nel patrimoniu de la nuesa tierra”.

Los y les estudiantes de la universidá uvieina nun puen dicilo más claro: “Esti señor ye una vergüeza pa la filoloxía, pal departamentu de Filoloxía Clásica y Románica y pal conxuntu de la Universidá d’Uviéu. De la mesma manera que si un docente de química negara la esistencia del cloru, nun impartiría química, ye alloriao ya inadmitible qu’un profesor de llatín niegue y faiga de menos hasta l’insultu un idioma deriváu del llatín de la mesma forma que’l castellán”.

Nel comunicáu, l’alumnáu atalanta que’l rectoráu de la Universidá d’Uviéu “debiera, non solo dar públicamente la so opinión del asuntu, sinón entamar un procesu sancionador contra Miguel Alarcos ante la enorme falta de respetu a les y los estudiantes falantes, a la llingua asturiana y a los mesmos Estatutos de la Universidá. Amás, damos anuncia que vamos llevar el casu de discriminación y humildación sufríes pola estudiante que recitó’l poema en asturianu per parte d’esti profesor ante’l Defensor Universitariu”.

 

Tamién te podria gustar