Portada Sociedá Les altes temperatures revelen restos arqueolóxicos ocultos n’Inglaterra

Les altes temperatures revelen restos arqueolóxicos ocultos n’Inglaterra

by redacción asturnews

La fola de calor sufierta nel Reinu Uníu reveló restos arqueolóxicos prehistóricos en distintes zones d’Inglaterra, según informó  l’organismu Historic England. Ente les ruines descubiertes atópense “misteriosos monumentos ceremoniales neolíticos, asentamientos de la Edá de Fierro, túmulos cuadraos y una granxa romana”.

L’afayu foi posible gracies a les altes temperatures esperimentaes nel país esti branu, que dexaron a los arqueólogos aéreos identificar con una mayor facilidá les marques de corte nel suelu secu. “Nos últimos meses, los arqueólogos de Historic England tuvieron buscando dende’l cielu patrones nos cultivos y na yerba que revelen miles d’años d’hestoria, ocultos hasta agora”, amiesta’l comunicáu.

“Esti clima apurrió les condiciones perfectes por que los nuesos espertos puedan ‘ver debaxo del suelu’, una y bones les marques tán muncho meyor definíes cuando la superficie tien menos mugor”, declaró al respeutu el director executivu del organismu, Duncan Wilson.

Unu de los descubrimientos más destacaos data d’ente los años 3600 y 3000 antes de Cristu. Tratase d’unos grandes rectángulos que, según créese, son monumentos del neolíticu. Estos fueron topaos gracies a fotografíes aérees y escáneres láser realizaos nel norte del condáu de Bedfordshire, nel este d’Inglaterra.

Los arqueólogos tamién atoparon restos procedentes de la Edá de Fierro en Cornualles (suroeste del país) y Yorkshire (norte), amás d’otros que daten de la Edá de Bronce en Derbyshire (centru-esti). “El clima escepcional abrió árees enteres al empar en llugar de solu unu o dos campos, y foi fascinante ver gráficamente tantos rastros del nuesu pasáu”, sentenció Wilson, responsable de la organización.

Tamién te podria gustar