Portada Fiestes Les 117 Fiestes del Bollu van cuntar con La Oreja de Van Gogh, Blima y Xera

Les 117 Fiestes del Bollu van cuntar con La Oreja de Van Gogh, Blima y Xera

by asturnet

Avilés prepara yá una de les fiestes más queríes polos sos ciudadanos: Les fiestes del Bollu, que lleguen en 2010 a la so edición 117. La “Comida na cai”, que se celebra’l 5 d’abril, va ser como siempres l’actu central, con más de 20.000 persones, pero les actividaes van entamar yá esti sábadu 27 de marzu, cola gala de Xanes y Xanines, que se celebrará nel Teatru Palacio Valdés.

Esi mesmu día, pela tarde, va celebrase’l sortéu pol que s’escueyen a les representantes de les fiestes, anque éstes, nun van llegar al so momentu más importante hasta la selmana que vien, el 3, 4 y 5 d’abril.

El sábadu 3 d’abril entamen los conciertos. A les 11 la nueche La Oreja de Van Gogh va llegar al centru deportivu El Quirinal, onde la entrada va ser de baldre hasta enllenar les 5.000 places del complexu.

El día grande, llunes 5 d’abril, va celebrase una Nueche Folk n’El Parche, a partir de les ocho y cola presencia de Blima y Xera. Amás, l’escritor avilesín Miguel Solís Santos va dar llectura al pregón, que va ser n’asturianu, lo que destacó’l conceyal de Cultura avilesín, Román Antonio Álvarez “creo que va ser la segunda vegada que se diga n’asturianu, la primera foi nel tiempu’l franquismu”, afirmó.

Amás, nestos díes va celebrase la Feria d’Alfarería Tradicional Villa d’Avilés, con 14 alfarero, la Feria d’Oficios Tradicionales Asturianos, con una decena de profesionales, l’Amuesa de Tonada Asturiana, el Desfile de Carroces y Xarrés y l’Alcuentru Coral d’Habaneres.

Tamién te podria gustar