Portada Uncategorized L’equipu rectoral de García Granda amplíase con seis nuevos directores d’área

L’equipu rectoral de García Granda amplíase con seis nuevos directores d’área

by redacción asturnews
Los seis primeros directores d'área del nuevu equipu rectoral

El rector de la Universidá d’Uviéu, Santiago García Granda, acaba de nomar a los seis primeros directores d’área nel procesu de designación de les persones que van tar al mandu de los distintos ámbitos en que se estructurará l’equipu rectoral. Los nomamientos ponen de manifiestu les característiques que dende’l Rectoráu preténdese simbolizen los responsables de cada ámbitu d’actuación del gobiernu institucional de la Universidá d’Uviéu: esperiencia, formación, mocedá y paridá.

La esperiencia notable ye una característica significativa en dellos perfiles como’l de David Melendi, con 8 años a los sos costazos dirixiendo la informática de la Universidá d’Uviéu, con una vasta conocencia de los grandes sistemes informáticos por so etapa profesional anterior. O nel de Serafín Marcos Costiella, cola so notable esperiencia dirixiendo y creando unidaes d’investigación nel campu de la salú, como xefe de serviciu del HUCA o impulsor de la Fundación Investigación Sanitaria de Llión.

Y la esperiencia investigadora destaca en tolos casos como amuesa’l perfil d’Ignacio del Rio, co-autor de cerca de 100 publicaciones científiques y con 3 sexenios d’investigación reconocíos magar la so mocedá; o’l d’Isabel Ruiz de la Peña, IP del Inventariu-catálogu de los bienes de l’ayalga artística d’interés pal Principáu d’Asturies; o’l de María Álvarez, autora de cinco libros y más d’una ventena d’artículos y capítulos de llibru, participando coles mesmes en más de trenta simposios y congresos.

Tampoco nun falta la esperiencia n’acción social dientru de la comunidá universitaria que tan nítidamente exemplifica María Mitre, como Presidenta del Comité d’Empresa y Secretaria de la Comisión Paritaria de la Universidá d’Uviéu, amás de Coordinadora del Grau en Turismu y del Programa de Movilidá SICUE.

La esperiencia de xestión nos distintos campos pa los que foron nomaos ye característica de cada nomamientu, como tamién lo ye la notable carrera investigadora y docente que pue atopase nos curriculum vitae que se rellacionen de siguío.

 

Isabel Ruiz de la Peña (Área d’Espardimientu y Promoción de la Investigación). Vicerrectoráu d’Investigación.

Isabel Ruiz de la Peña González (Uviéu, 1973). Profesora Titular d’Hestoria del Arte por habilitación nacional dende 2007, ye especialista na investigación del Arte Románico y na promoción y divulgación del Patrimoniu históricu-artísticu medieval. Foi parte del equipu ya investigadora principal del Inventariu-catálogu de los bienes de l’ayalga artística d’interés pal Principáu d’Asturies, y miembru d’otros proyectos d’investigación d’ámbitu nacional.

Amplió estudios de la so especialidá n’Hestoria del Arte Medieval en socesives estancies d’investigación desenvueltes na Universidá de Tours, nel Centru d’Estudios Superiores de Civilización Medieval de Poitiers y na Universidade Nova de Lisboa. Tamién participó na realización de delles esposiciones y ente les sos publicaciones científiques cúntense, al pie d’artículos de revistes y actes de congresos, cinco libros, ente los que destaca un manual universitariu d’Hestoria del Arte Medieval en collaboración.

 

María Mitre Aranda (Área de Posgráu y Títulos Propios). Vicerrectoráu d’Organización Académica.

María Mitre Aranda (Xixón, 1975) ye Profesora Contratada Doctora de la Área d’Organización d’Empreses. Doctora pola Universidá de Granada, ye Master Universitariu n’Alministración y Dirección d’Empreses (M.B.A.) pola Universidá d’Uviéu y Títulu d’Espertu en Calidá CCA desempeñando actividá n’empreses ya instituciones ente los años 1999 y 2002. Impartió docencia en grau, posgráu, doctoráu y tien participao en proyectos d’innovación docente y como ponente en xornaes sobre innovación educativa. Publicó artículos en revistes científiques y capítulos de llibru a nivel internacional y nacional. Participó en proyectos d’investigación de calter competitivu y dispon de contratos con empreses ya instituciones. Ye Presidenta del Comité d’Empresa y Secretaria de la Comisión Paritaria de la Universidá d’Uviéu. Ye Coordinadora del Grau en Turismu, Coordinadora del Programa de Movilidá SICUE y Miembru de la Comisión de Calidá de la Facultá de Comerciu, Turismu y Ciencies Sociales Xovellanos.

 

Serafín Marcos Costilla García (Área de Coordinación de Ciencies de la Salú). Vicerrectoráu d’Acción Tresversal y Cooperación cola Empresa.

Serafín Marcos Costilla García (Cuadros, Llión, 1953). Llicenciáu y Doctor en Medicina pola Universidá d’Uviéu. Especialista en Radiodianósticu pol Sistema MIR nel H.G.A (1978-1982), con formación complementaria nel Hospital M.D. Anderson Cancer Center and Tumor Institute de Houston, Texas, en 1989, becáu pol Institutu de Salú Carlos III. La so actividá asistencial exerciola nel Hospital de Llión, como Xefe de Sección dende 1982 a 2006 y darréu nel Hospital Universitariu Central d’Asturies (HUCA), onde foi Xefe de Serviciu ente Ochobre de 2011 y Payares de 2014. Na so actividá académica, foi Profesor Asociáu de Ciencies de la Salú de la Universidá de Llión (1988-2006); Profesor Titular d’Universidá Venceyáu, de Radioloxía y Medicina Física de la Universidá d’Uviéu dende 2006 hasta l’actualidá y Vicedecanu de la Facultá de Medicina d’Uviéu dende Xineru de 2011 a Marzu de 2012. En relación a la so actividá investigadora y producción científica, participó en 17 Proyectos d’Investigación financiaos en convocatories públiques, de los cualos cabo destacar, el destináu a la Puesta en marcha de la Unidá d’Imaxe Preclínica pa estudios d’investigación morfolóxicos y funcionales de pequeños animales de la Universidá d’Uviéu”. Publicó un importante númberu d’artículos científicos y tien dirixíes 8 tesis doctorales.

Nel Hospital de Llión, foi Presidente de la Comisión d’Investigación, dende 1998 a 2006, poniendo en marcha la Unidá Mista d’Investigación Universidá-Hospital de Llión, acreditada pol Institutu de Salú Carlos III, y la Fundación Investigación Sanitaria en Llión, presidida pol Rector de la Universidá, exerciendo’l cargu de Vicepresidente Executivu, hasta 2006. Miembru del Comité Editorial de la Revista Intervencionismo, presidente de la Comisión Científica de La Sociedá Española de Radioloxía Vascular y Intervencionista (SERVEI, 2000-2002); vocal de los Comités Científicos de dellos Congresos de Radioloxía y presidente del Comité Organizador de múltiples Cursos de Radioloxía Vascular y Intervencionista en Modelos Animales, realizaos na Facultá de Veterinaria de Llión ente 1998 y 2006.

 

David Melendi Palacio (Área d’Informática y Telecomunicaciones). Vicerrectoráu de Recursos Materiales y Tecnolóxicos.

David Melendi Palacio (Uviéu, 1974) ye Doctor pola Universidá d’Uviéu, Inxenieru n’Informática ya Inxenieru Técnicu n’Informática de Sistemes. En fundando la so propia empresa en 1997, ye contratáu por una consultora de tecnoloxía norteamericana pa la que trabaya más de dos años. Darréu incorpórase como profesor na Área d’Inxeniería Telemática del Departamentu d’Informática de la Universidá d’Uviéu, na que permanez na actualidá ocupando una plaza de Profesor Titular d’Universidá. Dende los sos entamos na Universidá, la so actividá docente centróse nel campu de les redes de computadores y de los servicios n’Internet. Per otru llau, na so faceta investigadora participó en casi 80 proyectos y contratos d’investigación, frutu de los cualos ye coautor de más de 40 publicaciones en revista, más de 60 ponencies en congresos nacionales ya internacionales, 11 capítulos en llibru, un llibru completu, 5 rexistros de propiedá intelectual n’esplotación y un estándar internacional del W3C (SMIL 3.0). Nel campu de la xestión foi Secretariu y Decanu del Colexu Oficial d’Inxenieros n’Informática del Principáu d’Asturies, amás d’ocupar mientres 8 años el cargu de Director d’Área d’Aplicaciones de Xestión na Universidá d’Uviéu.

 

Ignacio del Río (Área de Colexos Mayores y Residencies Universitaries). Vicerrectoráu d’Estudiantes.

Ignacio del Río (Avilés, 1968) ye Diplomáu en Maxisteriu (1989) y Llicenciáu en Química (1993) pola Universidá d’Uviéu. Realizó la so Tesis Doctoral nel Departamentu de Química Orgánica ya Inorgánica de la Universidá d’Uviéu so la dirección de los Profesores Javier A. Cabeza y Víctor Riera, llogrando’l Premiu Estraordinariu de Doctoráu en 1996. Mientres los años 1997 y 1998 realizó una estancia post-doctoral na Universidá de Utrecht (Holanda), dientro del programa de la Unión Europea “Marie Curie”. En 1999 reincorporase a la Universidá d’Uviéu como Profesor Asociáu de Química Inorgánica y dende l’añu 2008 sigui desenvolviendo la so actividá docente ya investigadora como Profesor Titular de Química Inorgánica. Nel añu 2003 recibió’l Premiu Nacional d’Investigadores Mozos que concede la Real Sociedá Española de Química.

Ye co-autor de cerca de 100 publicaciones científiques y tien reconocíos 3 sexenios d’investigación y foi miembru del Claustru Universitariu de la Universidá d’Uviéu (2002-2008), Secretariu del Departamentu de Química Orgánica ya Inorgánica de la Universidá d’Uviéu (2003-2008), Secretariu del Grupu Especializáu de Química Organometálica de la Real Sociedá Española de Química (2004-2012) y Miembru de la Xunta de Personal Docente ya Investigador de la Universidá d’Uviéu (2011-2016).

 

María Álvarez Fernández (Área d’Estensión Universitaria y PUMUO). Vicerrectoráu d’Estensión Universitaria y Proyección Internacional.

María Álvarez Fernández (Uviéu, 1978) ye Profesora Contratada Doctora de la Universidá d’Uviéu dende 2015. Doctorada n’Hestoria Medieval con Mención Internacional pola Universidá d’Uviéu dende l’añu 2006, empecipió la so carrera docente nel Departamentu d’Hestoria como Profesora Ayudante Doctora nel 2010 en concluyendo’l so posdoctoráu na Università degli Stdi di Siena (2007-2009). Ye Secretaria del Departamentu d’Hestoria dende Ochobre de 2012 y foi acreditada pola Axencia Nacional d’Evaluación de la Calidá y Acreditación (ANECA) como Profesora Titular d’Universidá (2015). Les sos principales llínees d’investigación tomen el complexu estudiu de les sociedaes urbanes medievales incluyendo, ente los sos ámbitos d’interés preferente les polítiques conceyiles en materia urbanístico y facendístico; la fiscalidá real y municipal na Corona de Castiella; l’urbanismu, la obra pública y el patrimoniu inmobiliariu; los poderes urbanos y les identidaes colectives.

Foi investigadora collaboradora en seis proyectos d’investigación nacionales competitivos dende 2003 y ye autora de cinco llibros y más d’una ventena d’artículos y capítulos de llibru, participando coles mesmes en más de trenta simposios, congresos, seminarios y foros científicos, nacionales ya internacionales de la so especialidá (Portugal, Italia, Reinu Uníu, República Checa).

Tamién te podria gustar