L’equipu del Sidrón enfótase n’atopar nuevos restos humanos nun segundu yacimientu

L’equipu d’espertos universitarios qu’esplora la cueva’l Sidrón, allugada nel conceyu de Piloña, enfótase n’atopar nun segundu yacimientu esterior cercanu a la cavidá nuevos restos humanos asemeyaos a los yá afayaos, cuya antigüedá cífrase en 40.000 años. El Principáu presentó esta tarde un conveniu ente Gobiernu y Universidá dotáu con 300.000 euros col que se garantiza la continuidá de les escavaciones pa los prósimos tres años.

Sedrán tres pagos añales d’ente 91.000 y 117.000 euros p’alitar a los responsables d’una investigación na que s’anuncia un inminente descubrimientu de proyección internacional y que va cuayando n’afayos non sólo orgánicos -güesos de neandertales-, sinón tamién técnicos: El responsable de la estaya antropolóxica de les escavaciones, Antonio Rosas, asoleyó güei n’Uviéu varies répliques de les osamentes atopaes, ente elles un güesu frontal, algamaes con modernes técniques que permiten caltener intacta la pieza orixinal.

Hasta agora, los espertos que trabayen nel yacimientu piloñetu dende l’añu 2000 analizaron un total de 46 amueses de güesos humanos d’ente los alredor de 700 restos afayaos, y una de les conclusiones principales ye que eses osamentes llegaron a la cueva depués d’un desplazamientu curtiu, fechu n’algunos casos con gran violencia.

L’oxetivu de los técnicos ye agora responder a la entruga de cuál ye la procedencia de los restos afayaos, siguir escavando p’atopar más güesos y entamar nuevos análisis de datación, too ello col enfotu de que dalgunes de les rempuestes tea oculta nun gran abrigu esterior asitiáu cerca de la cueva estudiada.

La Conseyera de Cultura, Comunicación Social y Turismu, Ana Rosa Migoya, destacó na presentación del conveniu los restos del Sidrón como’l conxuntu de restos neandertales más importante de la Península Ibérica. Pol so llau, el caderalgu coordinador de los trabayos, Javier Fortea, agradeció-y al Principáu el so sofitu y vaticinó nuevos ésitos na investigación.