Portada Educación L’equipu de Gotor aprueba en conseyu de gobiernu los estudios oficiales d’asturianu en Filoloxía

L’equipu de Gotor aprueba en conseyu de gobiernu los estudios oficiales d’asturianu en Filoloxía

by asturnet

El Conseyu de Gobiernu de la Universidá d’Uviéu ta acabante d’aprobar los cuatro títulos de grau nos que se dividirán dende esti momentu los estudios de la Facultá de Filoloxía, dientro del Espaciu Européu d’Educación Superior, ente los que s’atopa’l Minor d’Asturianu, que supón la primer titulación dientro de los estudios oficiales universitarios pa la llingua asturiana.

El Conceyu Universitariu pol Asturianu (CUPA), organización independiente asturianista y universitaria na que participen alumnos, personal d’alministración y servicios y vieyos alumnos y que cunta con representación nel Claustru de la Universidá d’Uviéu, espresó la so felicitación a la Universidá d’Uviéu “pola aprobación definitiva de los estudios d’asturianu”. El CUPA espera amás que nel futuru “los estudios d’asturianu sigan ampliando’l so espaciu, aspirando la organización a la creación futura d’un Grau de llingua asturiana”.

Amás, el CUPA, recuerda que ye’l momentu de crear, dientro de la Facultá de Filoloxía “un Departamentu propiu pa la Filoloxía Asturiana, qu’anguaño ta representada namás con un grupu d’investigación, el Seminariu de Llingua Asturiana”.

L’aprobación d’esti plan ye, dende’l puntu de vista del CUPA, “un pasu hestóricu pal asturianu, qu’entra per primer vegada dientro de les enseñances reglaes y oficiales universitaries”.

Tamién te podria gustar