L’axencia EFE repasa en semeyes los últimos 25 años nel panorama social y cultural d’Asturies

24 avientu 00:56 2007 Imprimir

La sala cultural Cajastur del Teatru Campoamor d’Uvieu agospia hasta’l prósimu 6 de xineru la amuesa de semeyes “La Asturias revelada”, que repasa en setenta fotografíes los acontecimientos más importantes de los últimos 25 años nel panorama cultural y social asturianu según la óptica de l’axencia EFE. Esta amuesa, organizada por Cajastur, bebe del archivu de semeyes del serviciu de noticies español. el cual ta dixitalizáu gran parte pa la ocasión, según informó la Directora de Documentación d’EFE, Concha Tejedor.

Ente los archivos gráficos que formen parte d’esta esbilla destaquen los que narren dellos aspectos de la sociedá civil y la cultura como’l descensu del Sella y otres como les del conflictu llaboral en Naval Xixón y en Duro Felguera, la del primer discursu públicu de don Felipe de Borbón o la del Papa Juan Pablo II na visita a Cuadonga. Dempues del 6 de xineru l’amuesa va treslladase a varios centros asturianos d’otres comunidaes autónomes.

La esposición entamó durante la celebración n’Uvieu (el pasáu 11 d’avientu) de la III Conferencia Mundial de Directivos d’EFE. Nesti eventu cásique un cientu de directivos de la empresa en tol mundiu aldericaron alredor de les estratexes y proyectos d’esti mediu de comunicación en 2008, y evaluaron el trabayu fechu en 2007.

  Categories:
Loading Facebook Comments ...