L’ATNL refuga la prohibición d’usar l’asturianu na Xunta

L’ATNL refuga la prohibición d’usar l’asturianu na Xunta
17 febreru 15:31 2016 Imprimir

L’Asociación de Trabayadores de la Normalización Llingüística n’Asturies refuga dafechu la prohibición del usu del asturianu y del gallego-asturianu na Xunta Xeneral, iniciativa tomada pol PP d’Asturies col apoyu del PSOE, Ciudadanos y FORO y que dicen, ente otres coses, por razones de “llegalidá, opinión y creencies”, enchipándose y esbabayando pa más, pol “llogru consiguíu”.

Nun comuicáu de prensa asoleyáu esti miércoles, l’asociación diz que “los derechos nun puen ser nunca cuestión d’opiniones nin creencies sinón de respetu; tienen de tar fundamentaos nos principios de diversidá, llibertá y tolerancia ente otres munches coses y too pa facer de la nuestra sociedá una sociedá incluyente, democrática y plural. Pa ellos l’asturianu nun ye namás que daqué secundario, molesto, prescindible; una llingua p’arrequexar a momentos mínimos que lleven a un conformismu social que nun-yos abulte peligrosu”.

Y, na so opinión too esto ta fecho adrede: “cola intención de frenar y bloquiar un procesu de normalización llingüísticu real, efectivu y de convivencia que-y dea a la llingua asturiana y al gallego-asturianu prestixu enforma ente la ciudadanía. Negar los derechos ye dir contra tol valir democráticu d’una sociedá, pero envalentonase por ello ye manifestar l’actitú más agresiva, dictatorial, déspota y tirana p’hacia los que nun piensen como ellos. Con estes actitúes nunca se pue llegar a algamar un consensu sinón una confrontación que va a más. En viendo esto, ta claro que pa facer valir los nuestros de derechos llingüísticos como ciudadanos y ciudadanes d’Asturies nun hai otru marcu más efectivu y únicu que la oficialidá”.

Loading Facebook Comments ...