L’ATNL reclama-y al Ayuntamientu d’Uviéu un Serviciu de Normalización

L’ATNL reclama-y al Ayuntamientu d’Uviéu un Serviciu de Normalización
12 febreru 09:53 2016 Imprimir

L’Asociación de Trabayadores de la Normalización Llingüística que l’Ayuntamientu d’Uviéu nun plantegue la creación d’un Serviciu de Normalización y úfrese pa asesorar y collaborar nel procesu de creación d’unu n’Uviéu.

Sigún l’Asociación, “hai 15 años, de la que s’abrió’l primer Serviciu de Normalización Llingüística, n’Asturies empicipiaba un procesu, con bien de retrasu, col que s’equiparaben les acciones sobre política llingüística al restu de comunidaes con llingua propia. Estes oficines pretendíen establecer una llinia de trabayu, marcando una serie d’oxetivos, col qu’aparar el retrocesu de la llingua en peligru de desapaición.” Col pasu de los años, “vese que los SNL son la meyor ferramienta cola que trabayar de manera planificada, directa, creando actitúes positives hacia l’asturianu y, de fechu, esta ye la manera de trabayar en 34 conceyos asturianos. Toos nun puen tar enquivocaos”.

Dende l’ATNL nun son a entender cómo Uviéu, capital d’Asturies y segunda ciudá en población, pudo permitise nun executar nengún tipu de midida pa protexer, recuperar y normalizar el mayor padremuñu que tien, que ye la llingua asturiana: “Cómo siendo’l centru neurálxicu de los servicios n’Asturies nun protexe los derechos llingüísticos y exerce de modelu pal restu d’Asturies”.

Nuna nota de prensa asoleyada esti día, l’ATNL quier dexar afitao que “les actuaciones en política llingüística han planificase y estudiase pa que tengan efectu positivu na población y sobre manera, pa que tengan éxitu. Primero de promocionar unos cuantos topónimos aleatoriamente hai qu’esixir l’aprobación y aplicación del decretu de toponimia del Conceyu d’Uviéu. Falar de rotular vehículos, ente otres coses, y nun diseñar un plan d’actuaciones pa normalizar l’asturianu dientro de l’Alministración ye un error. La creación del SNL daría forma planificada, con personal cualificao a estes actuaciones que se pretenden facer a saltu mata. Eso nun ye planificación llingüística, ye improvisación y, a estes altures, la llingua asturiana nun merez eso. Merez muncho más”.

Va selmanes l’asociación ya se manifestara reclamando la creación d’un SNL al más altu nivel, fuera del aria de cultura, “porque la esperiencia diznos que la tresversalidá ye la única garantía d’éxitu en política llingüística. Agora, amás, topámonos con un presupuestu bien ruin y que nun llega nin muncho nin poco a lo que s’invierte en ciudaes del so nivel poblacional como pue ser Xixón. Si tol presupuestu que va manexar pal asturianu s’invirtiera na creación d’un SNL, Uviéu empezaría a facer les coses bien, empezaría a recuperar el tiempu perdíu y a poner soluciones pa que la llingua asturiana sía una realidá na vida del conceyu”.

La situación de la llingua asturiana ye tan vulnerable, na opinión de l’ATNL que “precisa d’altura política, necesita una clase política que sía consciente de les midíes urxentes que s’han tomar pa nun collaborar na so desapaición. Dende l’Asociación de Trabayadores de la Normalización Llingüística tamos a disposición, como yá lo ficimos, d’asesorar y collaborar nel procesu de creación d’un SNL n’Uviéu, ponemos la nuestra esperiencia de 15 años al serviciu de la llingua asturiana”.

Loading Facebook Comments ...