L’ATNL denuncia otra vuelta la falta de planificación

by redacción asturnews | diciembre 23, 2017 12:54 pm

L’Asociación de Trabayadores de la Normalización Llingüística vieno acabante de facer anuncia esta selmana de la situación llaceriante que viven les oficines de Normalización Llingüística nos conceyos por mor de la falta de planificación del Principáu.

Nun comunicáu asoleyáu esti vienres día 22, L’Asociación de Trabayadores de la Normalización Llingüística vese na obligación de “denunciar otra vuelta más la falta de planificación de la precisamente denominada Dirección Xeneral de Planificación y Normalización Llingüística del Principáu d’Asturies”.

Y pa amuesa nun hay meyor cosa que mirar pala data na que nos alcontramos,  22 de diciembre, na que tovía nada nun se sabe de lo relativo a subvenciones pa entidaes locales “pesie a recoyer la convocatoria publicada nel BOPA del 24 d’agosto de 2017, que recoyía a la so vez la resolución de 9 d’agosto de 2017, de la Conseyería d’Educación y Cultura, pola que s’aprobaba la convocatoria de subvenciones pa les entidaes locales del Principáu d’Asturies nel añu 2017, llinia 5: normalización social del asturiano y gallego-asturiano en réxime de concurrencia competitiva, que’l plazu máximu pa resolver yera de trés meses a cuntar a partir del día 13 de setiembre, fecha na qu’acababa’l plazu pa presentar solicitúes”.

El casu ye qu’esta manera de proceder provoca pala Asociación qu’aconceya a los trabayadores de les oficines de normalización llingüística “trestornos graves nos conceyos, que na mayoría los casos cierran l’exerciciu a mitá del mes actual, polo que resulta difícil dar consecución a los proxectos planteaos en base a una financiación que nunca nun paez llegar; de fechu, munchos son los conceyos que van arrenunciar a los sos proxectos, por si nun fose abondo disuasoria la cantidá que se destina a los de toa Asturies, 40.000 €”.

Dende l’ATNL, quieren denunciar con esti comunicáu “la falta de compromisu pa cola normalización social del asturianu de la Dirección Xeneral de Planificación y Normalización Llingüística, que, a piques de cerrar l’añu, foi incapaz de proporcionar un refuerzu económicu tan importante a los conceyos asturianos, torgando, una vez más, que los servicios algamen unos obxectivos más que necesarios de normalidá nos sos territorios respectivos”.

Otramiente, gustaría-yos recalcar el papel importante “qu’esti tipu d’ayudes xueguen nel trabayu diariu de la rede de servicios de normalización llingüística, faltos, nuna mayoría importante de los casos, de recursos propios sobre los qu’actuar planteando campañas que redunden nuna promoción eficaz de les nuestres llingües, l’asturiano y el gallego-asturiano. Dicho esto, nun nos queda más que recomendar a la Dirección Xeneral de Planificación y Normalización Llingüística que s’aplique nel 2018 nel llabor que la so propia denominación suxer”.

Source URL: http://asturnews.com/latnl-denuncia-otra-vuelta-la-falta-de-planificacion/