L’atles ETLEN presentase nel Instituto da Lingua Galega

by redacción asturnews | marzo 12, 2018 3:11 pm

Esti próximu miércoles 14 de marzu, a les 13:00 hores, va presentase nel Instituto da Lingua Galega, en Santiago de Compostela, el nuevu atles ETLEN, qu’estudia la frontera llingüística ente los dominios gallegoportugués y asturlleonés na faza más occidental d’Asturies.

Trátase del Estudiu de la Transición Llingüística na Zona Eo-Navia, Asturies (ETLEN). Atles dialectográficucu–horiométricu–dialectométricu, ellaboráu pol Dr. Ramón d’Andrés, profesor titular de Filoloxía Asturiana na Universidá d’Uviéu y coordinador del Seminariu de Filoloxía Asturiana, xunto colos llingüistes Fernando Álvarez-Balbuena, Xosé Miguel Suárez y Miguel R. Monteavaro.

El llibru, frutu d’una investigación entamada nel añu 2000 y financiada pola Universidá d’Uviéu, la Conseyería d’Educación y Cultura y el Ministeriu d’Educación, Cultura y Deporte, ye la obra más completa sobre la realidá llingüística del Eo-Navia (gallego-asturianu). Nes sos 1.080 páxines qu’edita TRABE, ufre un total de 643 mapes a tou color; d’ellos, 531 son mapes dialectográficos y los 112 restantes mapes d’estadística xeollingüística, según dos novedosos procedimientos: la horiometría, ideada pol equipu de la Universidá d’Uviéu; y la dialectometría, d’acordies col métodu diseñáu na Universidá de Salzburgo (Austria). Cada mapa va acompañáu con una completísima información llingüística. Los datos colos que se xo l’atles ETLEN llográronse gracies a una rigorosa encuestación llingüística de la zona estudiada.

Source URL: http://asturnews.com/latles-etlen-presentase-nel-instituto-da-lingua-galega/