L’Atenéu Obreru rescata l’alcordanza de los presos de campos nazis

04 mayu 02:59 2004 Imprimir

“Los españoles antifascistas saludan a las fuerzas aliadas de liberación”. Con tala pancarta en castellán s’atoparon en mayu de 1945 los soldaos aliaos al aportar al campu de concentración de Mauthausen. L’Atenéu Obreru de Xixón rescata agora l’alcordanza de los presos de los campos d’esterminiu nazis con una esposición en Xixón y un alderique monoráficu n’Avilés.

El programa d’actos abrirálu el xueves un discutiniu públicu nel Palaciu de Valdecarzana, coles intervenciones de Rosa fernández, conceyala del Ayuntamientu d’Avilés; Angelita Andrada, representante n’Asturies d’Amical-Mauthausen; y Leonardo Borque, historiador y secretariu del Atenéu Obreru de Xixón. Darréu del alderique proyectaráse’l documental ‘Cerca del Danubio’.

Al otru día, vienres 7 de mayu, l’Antiguu Institutu Xovellanos de Xixón acoyerá una esposición de fotografíes sobre l’holocaustu nazi tomaes pol fotoperiodista Pedro Timón, mientres que’l sábadu 8 realizaráse una ofrenda floral nel monumentu erixíu pola Xunta Xeneral a los republicanos deportaos nos campos d’esterminiu y concentración de l’Alemania del Tercer Reich, autora l’asesinatu de seis millones de xudíos.

Nel campu de Mauthausen, güei en territoriu austriacu, tuvieron recluyíos diez mil presos, de los qu’alpenes sobrevivieron dos mil. Dos d’esos sobrevivientes, los asturianos Galo Ramos y Manuel Cortés, morrieron en feches recientes. L’Atenéu Obreru entama los sos actos d’homenaxe coincidiendo col 59 aniversariu de la lliberación d’esi campu de concentración.

  Categories:
Loading Facebook Comments ...