L’asturianu pierde un nuevu tren n’Europa al tar ausente nel memorándum qu’entrega Moratinos

Otru tren pasa de llargu. La llingua asturiana auséntase güei una migaya más d’Europa al nun figurar nel memorándum que’l Ministru d’Asuntos Esteriores, Miguel Ángel Moratinos, entrega a les autoridaes comunitaries pa solicitar formalmente la plena validez del euskera, el catalán y el gallegu como idiomes de trabayu nel ámbitu de la UE.

La razón d’esa ausencia nun ye nueva: Los responsables d’Esteriores argumenten que l’asturianu nun ye llingua oficial nel so territoriu y, poro, nun ye procedente incluyilu nel llistáu que güei reciben les autoridaes del Conseyu d’Esteriores de la UE. Asina, la falta d’estatus oficial de la llingua asturiana frena otra vuelta les posibilidaes d’espoxigue d’esti idioma n’Europa y failu una migaya menos visible, en contra de les recomendaciones del comité internacional d’espertos que visitó’l Principáu nos primeros díes d’avientu.

Nel informe presentáu por esti grupu, amás de reclamar la coficialidá nel plazu más breve posible, encamentábase afitar la enseñanza d’asturianu na Secundaria, recuperar la toponimia tradicional, financiar la producción cultural en llingua asturiana y otorga-y una presencia “altamente significativa” a esti idioma na futura radiotelevisión autonómica. Recomendaciones a les que la conseyera de Cultura, Ana Rosa Migoya, replicó que la coficialidá nun ta prevista nel pactu de Gobiernu y, poro, nun esistirá a lo menos antes del fin d’esta llexislatura autonómica, en 2007.

Nuna carta empobinada en setiembre pasáu al conseyeru de Xusticia, Seguridá Pública y Relaciones Esteriores del Principáu, Francisco García Valledor, el secretariu d’Estáu pa la Unión Europea, Alberto Navarro, afitaba’l deséu del Ministeriu d’Asuntos Esteriores de que l’asturianu seya oxetu d’una atención “especial” na UE pero negaba la posibilidá de consideralu como llingua oficial n’Europa.

Archivu. Especialistes europeos reclamen n’Uviéu mayor “visibilidá” pa la llingua asturiana