L’asturianu aporta a Valencia con un cursu de la Casa d’Asturies

26 setiembre 07:45 2014 Imprimir

La Casa d’Asturies en Valencia en collaboración con Iniciativa pol Asturianu y l’Academia de la Llingua Asturiana presenten el I Cursu d’Asturianu en Valencia. El cursu impartiráse de forma presencial en 25 hores dividides en clases de dos hores, un día a la selmana, d’ochobre a xineru de 2015 nel llar de la Casa d’Asturies.

A lo llargo les clases trataránse nociones de gramática, vocabulariu y sociollingüística como pa poder comprender y caltener una conversación básica al traviés de diferentes recursos didáuticos, recreación d’escenes, exercicios, videos, cantares… El cursu tará reconocíu con un diploma d’aprovechamientu emitíu pola Academia de la Llingua.

Cursu válidu tanto pa quienes desconozan totalmente la llingua asturiana como p’aquellos con conocencia por motivos familiares o d’orixe. Sí va ser requisitu necesariu pa siguir adecuadamente’l cursu lleer y escribir de forma fluida en llingua castellana.

La matrícula ye de 5€ pa socios de la Casa d’Asturies y 7€ pa los que nun lo seyan (inclúyendo’l material didáuticu que se va usar nel cursu).

Pa inscribise ha mandase un corréu lletrónicu a linfo@asturvalencia.com enantes del 12 d’ochobre de 2014 incluyendo: Nome y apellíos, edá, correu electrónicu, teléfonu móvil.

Habrá un primer conceyu pa coordinar el día de la selmana de les clases y otros detalles na segunda selmana d’ochobre.

El I Cursu d’Asturianu en Valencia realizaráse gracies a la cesión de material y orientación didáutica que l’asociación Iniciativa pol Asturianu tuvo cola Casa d’Asturies en Valencia.

  Categories:
Loading Facebook Comments ...