Portada Lliteratura L’asturiana Olvido García Valdés va ser la nueva directora xeneral del Llibru y Fomentu de Llectura

L’asturiana Olvido García Valdés va ser la nueva directora xeneral del Llibru y Fomentu de Llectura

by redacción asturnews
OLVIDO GARCIA VALDES - Foto: DONOSTIA KULTURA (https://www.flickr.com/photos/donostiakultura/)

El Conseyu de Ministros vieno acabante normar a Adriana Moscoso, directora xeneral d’Industries Culturales; a la poeta y ensayista asturiana Olvido García Valdés, directora xeneral del Llibru y Fomentu de la Llectura; y a Román Fernández-Baca Casares, director xeneral de Belles Artes.

Al nomamientu d’Amaya de Miguel como nueva directora xeneral del Inaem, adelantrao pol ministru de Cultura, José Guirao, sumense estos nuevos nomamientos, según informó’l ministeriu de Cultura y Deporte al términu de la rueda de prensa posterior al Conseyu de Ministros.

Esta poeta y ensayista asturiana (Santianes de Molenes de Pravia, 1950) ye caderalga de Llingua Castellana y Lliteratura y foi tamién directora del Institutu Cervantes de Toulouse (Francia). Olvido García Valdés  cunta col Premiu Nacional de Poesía 2007 pol so llibru Y toos tábamos vivos (Tusquets Editores, Barcelona, 2006).

Pela so parte, Adriana Moscoso del Prau Hernández (Pamplona, 1972), como nueva directora xeneral d’Industries Culturales, foi, dende febreru de 2017 hasta l’actualidá, directora d’Asuntos Xurídicos y Públicos de la Confederación Internacional de Sociedaes d’Autores y Compositores (Cisac).

Primeramente, según la nota del ministeriu, foi secretaria Xeneral del Institutu de Derechu d’Autor, directora de l’Asesoría Xurídica de la Sociedá Estatal pa l’Acción Cultural Esterior (Seacex) y asesora xurídica de la Sociedá Xeneral d’Autores y Editores (SGAE).

La dirección xeneral de Belles Artes va tar al cargu de Román Fernández-Baca Casares, arquiteutu malagueñu (1951) especializáu n’Urbanismu que foi hasta l’actualidá director del Institutu Andaluz de Patrimoniu Históricu de la Conseyería de Cultura de la Xunta d’Andalucía. Cola so dirección, l’Institutu Andaluz de Patrimoniu Históricu llogró numberosos premios como’l Premiu Nacional de Restauración y Caltenimientu de Bienes Culturales (2006) o la Medaya d’Oru de l’Asociación Española d’Amigos de los Castiellos (2007).

Tamién te podria gustar