L’Arribada convoca los Timón 2016

L’Arribada convoca los Timón 2016
20 agostu 16:56 2015 Imprimir

Esti miércoles 12 d’agostu, abríase la convocatoria de los Premios Timón 2016 qu’entama l’Asociación Cultural  L’Arribada. Les candidatures, razonaes, puen ser presentaes por una persona o un colectivu nes señes de corréu electrónicu de l’asociación, larribada@gmail.com, hasta’l 10 d’avientu de 2015.

Los Premios Timón destínense a reconocer la trayectoria creativa de los escritores d’Asturies.  Pa esta edición, nes estayes lliteraries, opten a los gallardones escritores que nacieren nel añu 1.966 o antes. Trátase del X Premiu Timón, p’autores en llingua asturiana y n’eonaviego, y del VII Premio Timón, p’autores asturianos en llingua castellana.

Igualmente, prémiase per aciu del IV Premiu Timón de Cultura Asturiana a asociaciones, sociedaes, fundaciones ya instituciones con sede n’Asturies que tengan como fin la conservación y promoción de la identidá cultural de nueso, y a persones con una trayeutoria valoratible nesi ámbitu.

P’alcordar los gallardones l’asociación convocará trés xuraos, ún por cada modalidá, formaos por persones venceyaes a la cultura y la lliteratura del país. Estes distinciones, consistentes nuna obra del escultor y ceramista xixonés Jesus Castañón pa cada premiu, entregaránse mientres la cellebración de la oncena edición de L’Arribada.

Los ganadores anteriores fueron; del Premiu Timón, Nené Losada Rico (2007),  Xuan Xosé Sánchez Vicente (2008),  Manuel García ‘El Galano’ (2009), Roberto González-Quevedo (2010), Vicente García Oliva (2011),  Antón García (2012), Miguel Rojo (2013),  Xosé Bolado (2014) y Esther Prieto (2015); del Premio Timón, Luis Fernández Roces (2010),  Juan Méjica (2011),  Fernando Menéndez (2012), Gonzalo Suárez (2013),  Carmen Ruiz-Tilve (2014) y Francisco García Pérez (2015); y del Premiu Timón de Cultura Asturiana l’Asociación Cultural Ensame Sidreru (2013), la Xunta pola Defensa de la Llingua Asturiana (2014) y l’Asociación pola Recuperación de Sidros y Comedies “El Cencerru” (2015).

  Article "tagged" as:
  Categories:
Loading Facebook Comments ...