Portada Conceyos L’área de Seguridá Ciudadana d’Uviéu pon en marcha la Policía Turística

L’área de Seguridá Ciudadana d’Uviéu pon en marcha la Policía Turística

by redacción asturnews

L’área de Seguridá Ciudadana d’Uviéu vieno acabante poner en marcha la Policía Turística, una  iniciativa, que s’enmarca dientro de la campaña “De xuru Uviéu”, y qu’escuerre que los visitantes siéntanse amás de seguros, asesoraos y sofitaos y puedan promocionar el conceyu como destín turísticu en siendo testigos de la bona relación ente los axentes, vecinos y sectores económicos como la hostelería.

Los conceyales de Seguridá Ciudadana, Jose Ramón Prado, y Turismu, Alfredo García Quintana, asistieron esta mañana al entamu d’esti cursu nel que participen 20 axentes locales y pol que yá s’interesaron otros cuerpos, como la Policía Local de Llanes y de Ponferrada.

Venti axentes de la Policía Local participaben nun cursu entamáu pel área de Seguridá Ciudadana pa crear la “Policía turística, una esperiencia piloto”  indicó’l responsable de la conceyalía, Jose Ramón Prado, “que ponemos en marcha dientro de la campaña “De xuru Uviéu”, cola qu’escorremos que los visitantes siéntanse, amás de seguros, atendíos, asesoraos y sofitaos polos axentes municipales”. Estos turistes van ser testigos “de la bona relación de la Policía Local con vecinos y hosteleros, van treslladar la so esperiencia al traviés de la boca a boca y van consiguir atraer a más turistes amás de repitir la so visita”, añedió.  El conceyal quixo estimar l’esfuerzu y la motivación” de los axentes, qu’escosaron rápido les places d’esti cursu pioneru pol que tamién s’interesaron yá la Policía Local de Llanes y Ponferrada.

El conceyal de Turismu, Alfredo García Quintana, amosóse “satisfechu ya ilusionáu con esti primer proyectu de formación porque’l Turismu ye cosa de tolos uvieinos, que desenvuelven un papel bien importante por que los turistes cumplan les sos mires. Aplaudimos de manera importante esta iniciativa de la conceyalía de Seguridá Ciudadana y esperamos que podamos siguir”.

Según esplicó’l ponente de la formación, Miguel Morán, el cursu va dotar a los axentes de les ferramientes necesaries pa “xestionar les emociones y les narratives de los visitantes por que los turistes convertir nos nuesos vendedores” amás de siguir velando pola seguridá de los vecinos y de los más de 4 millones de visitantes que lleguen a la nuesa ciudá cada añu.

Tamién te podria gustar