L’área d’Educación d’IX pide a la Conseyería paralizar fusiones de centros

L’área d’Educación d’IX pide a la Conseyería paralizar fusiones de centros
14 marzu 13:15 2016 Imprimir

L’Área d’Educación d’IX pide a la Conseyería la paralización de la fusión de centros escolares impuesta y esixe la participación de la comunidá educativa nel procesu, por tar en desalcuerdu, per un sitiu, poles formes emplegaes pola Conseyería pa llevar a cabu’l procesu de fusión.

Na opinión de l’area d’educación “ye una midida tomada de manera precipitada y aplicada de manera impositiva, quitando a la comunidá escolar del derechu a la participación, negociación ya información. IX entiende qu’una midida de la transcendencia d’esta rique del máximu consensu polo qu’esixe percanciar de los conseyos escolares de centru y del conseyu escolar del Principáu les sos aportaciones”.

La metodoloxía de la imposición aplicada pola Conseyería d’Educación contradizse con declaraciones del Conseyu de Gobiernu realizaes el pasáu día 9 al afirmando que “El Gobiernu d’Asturies va consultar y va pidir collaboración a más de 8.000 asociaciones y entidaes pa preparar un Llibru Blanco de Participación Ciudadana, un documentu col que va impulsar la cooperación de la ciudadanía na xestión de los asuntos públicos y que la so presentación ta prevista pal segundu semestre del añu.”

Per otru llau, IX ta en desalcuerdu col fondu de la midida. Cola metodoloxía emplegada son bien pocu creíbles les manifestaciones de la Conseyería de que nun va haber amenorgamientu de les plantiyes docentes o de que nos centros realizaranse les obres necesaries pa dotalos de les infraestructures necesaries, arriendes d’otra serie de problemes non menores como la xestión de los llibros escolares, la ellaboración del proyectu Educativu de Centru o la elección de la nueva dirección.

  Categories:
Loading Facebook Comments ...