Portada Uncategorized L’aragonés ya tien Academia de la Llingua y académicos

L’aragonés ya tien Academia de la Llingua y académicos

by redacción asturnews

El Conseyu de Gobiernu aprobó esti xueves 29 de xunetu, el nomamientu de los primeros quince miembros de l’Academia Aragonesa de la Llingua que s’articula en dos secciones, l’Institutu de l’aragonés y el Institut aragonès del català, quedando otros quince por nomar.

Esti órganu foi creáu pola Llei 3/2013, de 9 de mayu, d’usu, protección y promoción de les llingües y modalidaes llingüístiques propies d’Aragón como institución científica oficial nel ámbitu de les llingües y modalidaes llingüístiques propies.

Les sos competencies son establecer les normes referíes al usu correctu de les llingües y modalidaes llingüístiques propies d’Aragón y asesorar a los poderes públicos ya instituciones sobro temes rellacionaes col usu correctu de les llingües y modalidaes llingüístiques propies y cola so promoción social.

Según la Llei, los académicos tienen de ser persones de reconocíu prestíu nel ámbitu de la filoloxía, lliteratura y llingüística, preferentemente doctores y nativos falantes, que cunten con una llarga trayectoria na práctica y el fomentu de los valores llingüísticu y lliterariu propios de la comunidá aragonesa, y na que tean representaes les llingües y modalidaes llingüístiques propies d’Aragón.

El cargu d’académicu nun trai retribución y la elección de los quince primeros “de númberu” correspuendía, a partes iguales, a les Cortes d’Aragón, el Gobiernu d’Aragón y l’Universidá de Zaragoza. L’Academia va poder completase con otros 15 académicos de númberu y colos académicos correspondientes y d’honor que se considere necesariu.

Estos primeros miembros que fueron nomaos y que tienen agora d’escoyer al presidente, son los que vienen darréu y que se dieron a conocer ayeri xueves:

  • Carmen Alcover Pinós (Mazaleón, 1952). Doctora en Filoloxía. Técnica de llingües del Gobiernu d’Aragón (hasta 2017) y coordinadora del Seminariu Permanente de llingua catalana. Foi miembru del Conseyu Cimeru de les Llingües d’Aragón.
  • María Luisa Arnal Purroy (Albelda). Doctora en Filoloxía. Profesora titular de Lliteratura Española de la Universidá de Zaragoza. Tesis sobro la fala de la Baxa Ribagorza occidental.
  • José Bada Panillo (Fabara, 1929). Doctor en Teoloxía. Primer conseyeru de Cultura del Gobiernu d’Aragón. Foi presidente del Conseyu Cimeru de les Llingües d’Aragón. Premiu Desideri Lombarte del Gobiernu d’Aragón en 2016.
  • María Pilar Benítez Marco (Zaragoza, 1964). Doctora en Filoloxía. Tesis sobro l’aragonés ansotano. Autora d’un manual d’enseñanza del aragonés, profesora acomuñada de Didáctica de les Llingües y del Diploma d’Especialización en Filoloxía Aragonesa de la Universidá de Zaragoza. Premio Miguel Labordeta del Gobiernu d’Aragón, 2018.
  • Manuel Castán Espot (Gabás, 1955). Llicenciáu en Filoloxía, foi profesor d’Educación Secundaria Obligatoria. Foi miembru del Conseyu Cimeru de les Llingües d’Aragón.
  • María Ángeles Ciprés Palacín (Huesca, 1957). Doctora en Filoloxía Francesa. Catedrática de Filoloxía francesa de la Universidá Complutense de Madrid. Directora del Collège deas Hautes Études Européennes “Miguel Servet” de París.
  • Ánchel Conte Cazcarro (Alcolea de Cinca, 1942). Doctor n’Hestoria y catedráticu d’institutu. Autor de numberoses noveles y llibros de poesía n’aragonés. Premio Ciudá de Barbastro, 1970 y de la Universidá de Zaragoza, 2001. Medaya al méritu cultural del Gobiernu d’Aragón, 2009.
  • Javier Giralt Latorre (Barcelona, 1967, orixinariu de San Esteban de Llitera). Doctor en Filoloxía Hispánica. Tesis sobro Contribución al estudiu de les fales de La Llitera. Profesor titular de Filoloxía Catalana de la Universidá de Zaragoza. Foi miembru del Conseyu Cimeru de les Llingües d’Aragón.
  • Mercés Llop Alfonso (Nonaspe, 1957). Llicenciada en Filosofía y Ciencies de la Educación y maestra. Escritora en catalán d’Aragón, ganó en dos ocasiones (2010 y 2020) el Premiu Guillem Nicolau del Gobiernu d’Aragón.
  • Juan Pablo Martínez Cortés (Zaragoza, 1976). Doctor inxenieru de telecomunicaciones, llevó a cabo trabajo de divulgación de la llingua aragonés y desenvuelto ferramientes de llingüística computacional pa esta llingua.
  • María Teresa Moret Oliver (Mequinenza, 1974). Doctora en Filoloxía Hispánica. Tesis sobro Documentación histórica aragonesa del sieglu XV. Profesora de catalán na Escuela Oficial d’Idiomes de Alcañiz y de la Universidá de Zaragoza.
  • Francho Nagore Laín (Zaragoza, 1951). Doctor en Filoloxía Románica. Profesor na Universidá de Zaragoza, foi director del Diploma d’Especialización en Filoloxía Aragonesa. Tesis doctoral sobro l’aragonés de Panticosa. Autor de la primer gramática de la llingua aragonesa (1979). Director de la área de llingua y lliteratura del Institutu d’Estudios Altoaragoneses.
  • Francho Rodés Orquín (Sariñena, 1960). Llicenciáu en Filoloxía Hispánica, foi profesor d’Educación Secundaria Obligatoria y autor de llibros de poemes n’aragonés y de diversos trabayos d’investigación sobro esta llingua.
  • Ramón Sistac Vicén (Barcelona, 1958, orixinariu de Camporrells). Doctor en Filoloxía Catalana. Profesor de dialectoloxía catalana de la Universidá de Lleida.
  • José Solana Dueso (Plan, 1946). Doctor en Filosofía. Catedráticu eméritu de la Universidá de Zaragoza. Escritor n’aragonés chistabín. Premiu Arnal Cavero del Gobiernu d’Aragón, 2017

Tamién te podria gustar