Portada Música L’Anuariu de la Música Asturiana 2015 ya pue algamase en bien de locales

L’Anuariu de la Música Asturiana 2015 ya pue algamase en bien de locales

by redacción asturnews
Anuariu de la Música Asturiana 2015

L’Anuariu de la Música Asturiana llega un añu más fiel a la so cita per estes feches y failo con un repasu fondu a lo que dio de sí’l pasáu 2015 na música tradicional, el folk, el rock o la canción d’autor, con secciones qu’inclúin reportaxes, informes, entrevistes, crítiques, opinión, cróniques, recoyida de material o anuncies. La característica principal d’esta entrega nueva ye’l so calter gratuítu.

L’Entamu, nesta ocasión titúlase «Por una música asturiana viva» y nél fálase de la problemática de los conciertos en locales, dexando vien a les clares que “fai falta una llexislación clara y favorecedora d’esta realidá que, respetando los lóxicos derechos de vecinos y la normativa sobre ruíu, apoye que la música siga sonando nes nuestres cais, que los nuestros músicos y programadores nun se sientan persiguíos”, p’acabar pidiendo que los representantes políticos seyan responsables y afronten los cambios necesarios pa iguar esta cuestión.

Dedícase especial atención a la rellación ente música asturiana y medios audiovisuales (fundamentalmente públicos), con dos informes del periodista Damián Barreiro titulaos «Operación Tonada. Un repasu a la presencia de la canción asturiana nos medios audiovisuales» y «De Luar a Isabel Pantoja. Formatos musicales nes televisiones autonómiques»; entrevístase a la cantante Anabel Santiago y al grupu l.lenizu Spanta la Xente; l’investigador y estudiosu Alberto Álvarez Peña trata sobre’l romance de Galancina y les Fogueres de Nadal, mientres que Toya Solís (graduada n’Historia y Ciencies de la Música) afonda na misa de gaita d’Asturies; el periodista Xicu Ariza fai repasu de les producciones rockeres del añu (Misiva, La Tarrancha, Skontra y Bacotexo); l’artículu de Damián Barreiro «Les Asturies, 12 points» muéstranos el pasáu, presente y futuru del Premiu al Meyor Cantar; coméntense discos como La fonda de Lola d’Héctor Braga o’l recopilatoriu Bestiariu; n’opinión apaecen firmes como les d’Ismael Arias, Ignaciu Llope o Adolfo Camilo; ente otros conteníos.

Zárrase, como ye vezu, cola sección Collecha, onde apaecen les producciones del añu 2015, venticinco en total (centraes fundamentalmente na tonada y el rock), mui per debaxo de les d’hai unos años, según comenten los responsables del A.M.A. El volume compleméntase con un discu onde se recueyen muestres de lo meyor qu’ufiertó’l 2015, con diecisiete cortes repartíos n’estilos como la tonada, el folk, el rock, les bandes de gaites, la canción d’autor, el hip hop o los soníos esperimentales, con artistes y grupos como Anabel Santiago, Vrienden, Los Collacios, Filanda, La Bande, Misiva, Skontra, La Tarrancha, Dixebra, Pop Piquiñín, K-Nalón, Fernando Valle Roso o Eladio Díaz Control Z. Dende Goxe Producciones, editora d’esti anuariu, quieren rescamplar l’esfuerciu que supón asoleyar una publicación como esta, financiada esclusivamente con publicidá y ensin ayuda institucional, al renunciar a la subvención a medios de comunicación pa la promoción del asturianu al considerala insuficiente pa con un proyectu como esti, con dieciséis años de vida y una incidencia bultable nel panorama musical asturianu y n’asturianu.

En cuantes a novedaes, rescampla’l formatu nuevu, más pequeñu y amañosu, anque sigue manteniendo una paxinación curiosa (80) y a tou color, pero la característica principal d’esta entrega nueva ye’l so calter gratuítu, que representa un apueste pola so mayor difusión ente tolos aficionaos o interesaos na música d’espresión asturiana.

L’A.M.A. 2015 pue consiguise en bien de locales espardíos per bona parte de la xeografía asturiana, concretamente: – Uviéu: L’Esperteyu y La Llegra. – Xixón: Trisquel, Sestaferia y Paradiso. – Avilés: El Cafetón y El Cabanón. – Candás: Llibrería Palabras de Caramelo. – Mieres: L’Abellugu y Habana. – Nava: La Naveta. – Tinéu: Llibrería Asturias. – Villaviciosa: La Esbilla y Ringo Rango. – La Pola (Siero): Cuévano. – Villanueva (Stu. Adrianu): El Sabil. – Ribeseya: El Corquiéu. Nestos puntos de distribución (y en dalgún más) van repartise los exemplares del Anuariu de la Música Asturiana 2015 (revista y cedé) a lo llargo de los próximos díes, amás d’una tirada especial del discu, too ello col enfotu de promocionar y esparder l’interés y querencia pol trabayu y la creación de los músicos del país.

Tamién te podria gustar