La Xunta de Gobiernu de la Sociedá Uvieina de Festexos (SOF) aprobó esti llunes un presupuestu de 80.000 euros pal Antroxu uvieín, que va desenvolvese los díes 12 y 13 de febreru.
La propuesta aprobose colos votos a favor de tolos grupos políticos, salvo l’astención del Partíu Popular (PP), y como principal novedá, va llevase a cabu, simultáneamente, en delles cais y places del centru y cascu antiguu y va tener como protagonistes a los más pequenos.
Con un presupuestu total de 80.000 euros, el Antroxu uvieín va celebrase, como yá ye tradicional, una selmana más tarde que n’otres grandes ciudaes como Xixón o Avilés, faciendo posible asina la participación de tolos asturianos. Los díes d’Antroxu n’Uviéu van ser el 12 y el 13 de febreru. La SOF programó pal día 12, el Día del Antroxu de los neños, na plaza de la Catedral, una gran fiesta infantil que, sol nome de “Carvulandia”, va arrincar a primer hora de la tarde con teatru, música y actividaes pa los más pequenos, con edaes entendíes ente 1 y 5 años. El mesmu escenariu va acoyer, en rematando esti espectáculu, el Concursu de Antroxu infantil nes sos distintes modalidaes, de la que dellos grupos de teatru percuerren les places del cascu antiguu y otres zones como la cai Gascona.
El día 13, sábadu, tamién va ser novedá anguaño l’espectáculu “Papanú”, un proyectu global d’entretenimientu y educación infantil desenvueltu por profesionales de la psicoloxía infantil, docentes, músicos y productores de televisión y empobináu a neños de 2 a 9 años, nel que s’utiliza la música como vehículu d’aprendizaxe. Va Tener llugar, a partir de les 12.30 hores, na plaza de la Catedral y va ser gratuitu.
El mesmu día, a les 17 hores, va arrincar el tradicional Desfile de Antroxu, que va partir de la redolada de La Llosa de Renfe y va escurrir poles cais d’Uviéu hasta llegar a la plaza de la Catedral, que va acoyer el Concursu d’Antroxu nes sos distintes modalidaes (adultos, centros sociales, hostelería-…). La SOF amontó anguaño la cuantía de los premios que se van conceder a los ganadores de les distintes categoríes, aprobando un costu total de 19.810 euros.
L’Antroxu uvieín va tocar al so fin col tradicional Entierru de la Sardina qu’esta vegada, y tamién como novedá, va celebrase na plaza de Porlier y nel que van participar distintes compañíes de teatru. Mientres se celebra esta fiesta un grupu de teatru va percorrer l’Uviéu antiguu y va rematar na plaza de la Catedral con un espectáculu pirotécnicu y musical, al que se van sumar, darréu, los actores y el públicu participantes na quema de la Sardina.
