L’Antroxu 2021 de Xixón treslládase al espaciu dixital

L’Antroxu 2021 de Xixón treslládase al espaciu dixital
01 febreru 08:58 2021 Imprimir

“Esto nun ye el l´Antroxu de Xixón” … Asina reza’l cartelu del Antroxu xixonés d’esti 2021. La crisis sanitaria de la COVID19 y les restricciones impuestes pola Conseyería de Salú del Principáu d’Asturies obligaron al Departamentu de Festexos del Conceyu a reinventar la próxima edición d’esta Fiesta d’Interés Turísticu Rexonal.

Del 12 al 16 de febrero Xixón nun va vivir el so tradicional Antroxu, tal que asegura Alberto Ferrao, Conceyal d’Educación y Cultura: «El virus nun entiende de fiestes, nun estrema feches». Por ello, nun se va entamar dende Divertia nenguna actividá que suponga concentración de persones y de esta manera suspende’l pregón, les actuaciones musicales, el desfile y los concursos d’amarutes y charangues. Coles mesmes, tampoco se va decorar, nin se va allumar el Paséu de Begoña.

D’esta miente, el Antroxu 2021 va treslladase al formatu dixital, anque se va caltener la tradición d’amarutar la estatua de Pelayo (en fecha ensin determinar y n’horariu nocherniegu pa evitar presencia de públicu). Coles mesmes, tamién la Sardina va ser protagonista, pero va vivir el so particular Antroxu “enlatada” na so residencia xixonesa, dende onde va colgar videos na web de Festexos y dende onde va realizar directos nos sos perfil de les sos redes sociales. Otru de los protagonistes, vía on-line, va ser Agustín, (Alberto Rodríguez), el conocíu presentador del Concursu de Charangues, que va ufiertar vídeos y conexones tantu na web, como tamién nes sos redes sociales.

El Departamentu de Festexos cunta de nuevu nesta edición, p’animar el Antroxu, cola collaboración de les charangues xixoneses, coles que caltuvo contactu nos últimos meses. Les charangues, qu’anguaño nun pudieron ensayar y nun pudieron axuntase al ser grupos numberosos, van arriquecer la web con vídeos d’actuaciones pasaes, nuevos vídeos y tamién con imaxes de cómo viven el Antroxu, cumpliendo les midíes y les restricciones sanitaries. Divertia tamién va abrir esi espaciu virtual mientres el Antroxu a los y les xixoneses por qu’unvien les sos fotografíes y conéctense nos directos ufiertaos pola Sardina nel so perfil de Instagram.

El cartelu d’esti Antroxu de 2021 reza “Esto nun ye’l Antroxu de Xixón”… Un cartelu, diseñáu por Divertia, (ensin el coloríu habitual, cola R al aviesu, con un Antroxu “pates arriba”) pa recordar, como asegura Lara Martínez, xerente de Divertia, que «nun ye’l Antroxu que nos gustara entamar, pero ye’l que toca… Tien de primar la seguridá y tenemos la responsabilidá de favorecer una convivencia que garantice la salú de la ciudadanía».

  Categories: