L’antropóloga Alie Van Der Schaaf defende la oficialidá y la enseñanza trillingüe

29 marzu 23:19 2006 Imprimir

L’antropóloga holandesa Alie Van Der Schaaf intervién esti xueves 30 na segunda de les xornaes de los Alcuentros de Llingua Minoritaria y Educación que se celebren na Escuela Universitaria de Maxisteriu d’Uviéu. Van Der Schaaf, colaboradora del proyectu Mercator y representante de l’Asociación Internacional pa la Protección de les Llingües Amenazaes, defende la oficialidá y la enseñanza del inglés xunto al asturiano dende los primeros ciclos formativos.

La esperta holandesa, miembru de la comunidá frisona, afirma nuna entrevista publicada na edición d’esti xueves pol diariu La Nueva España que la reconocencia de la oficialidá pal asturianu ye imprescindible: “si nun ye asina, les personas deprenden que la so llingua nun paga la pena, que ye inferior” y que “valorar el propiu idioma ye fundamental pa l’autoestima (d’una sociedá)”. Alie Van Der Schaffv a pronunciar a les 18.00 hores una conferencia titulada “Educación bi/trillingüe n’Europa” dientro los Alcuentros entamaos pola Escuela de Maxisteriu y l’Academia de la Llingua. Respective a les ventayes d’una educación plurillingüe, la esperta frisona dixo que “cada vez hai más iniciatives y proyectos d’educación billingüe y trillingüe qu’inclúin l’inglés, asina los escolinos al empar que deprenden que la so llingua paga la pena, meyoren el so inglés” y defendió p’Asturies un modelu pa escomenza “dende la primer edá na escuela los estudios d’asturiano ya inglés”.

Darréu de la conferencia de Van Der Schaaf intervién nos Alcuentros de Llingua Minoritaria y Educación la profesora de la Universidá d’Uviéu Loreto Díaz pa falar de “Tratamientu didáuticu del vocabulariu de la llingua asturiana” y después d’ella, el profesor de la Universidá de Xinebra, Joaquim Dolz, va pronunciar la conferencia “Delles estratexes didáutiques na enseñanza d’una llingua minoritaria”.

  Categories:
Loading Facebook Comments ...