L’amenaza de derrumbe de Notre Dame persisti mediu añu dempués de la quema

22 ochobre 08:42 2019 Imprimir

El rector de la catedral de Notre Dame de París, Patrick Chauvet, dixo esti martes que la retirada del andamiu que se quemara sobro la cubierta del edificiu, mientres la quema del pasáu 15 d’abril, supón el principal riesgu d’esbarrumbamientu, polo que la seguridá del mesmu nun va tar garantizada hasta que se desmonte.

Cuando se cumplen seis meses de la quema qu’afaró la cubierta y l’aguya, dexando bóvedes y elementos del transepto y la nave afectaos, la Diócesis de París recordó nuna rueda de prensa que la fase de estabilización del edificiu ta siendo especialmente delicada. “El principal momentu va ser la construcción d’un andamiu enriba del andamiu quemáu pa cortar y retirar esti postreru. Esto va llevar muncho tiempu porque nun puede cayer sobro la catedral. Si asocediera, les trés bóvedes que queden de pies nun aguantaríen”, dixo Chauvet.

El rector aportunó en que la urxencia de les obres centraes nesa operación, pos “hai delles tonelaes de pesu sobro la catedral”. “A día de güei non puede dise rápido pa nun dar un pasu en falsu”, señaló. Una vegada que se retire, va ser posible dicir que la catedral ta a salvo, añedió.

Dende la see de la diócesis de París, frente a la catedral, apréciense les obres nel edificiu, qu’avancen con cachaza. La entrada al edificiu trai tou un protocolu de seguridá pola presencia de chombu, y a la salida xuna duecha obligatoria enllarga cualquier accesu en más de media hora.

Según Chauvet, los obreros trabayen nuna tensión continuo porque tán colgaos de cuerdes pel esterior. Entá asina, los responsables relixosos de la catedral confíen en que la estabilización pueda terminar, según les feches envaloraes, la próxima primavera pa empecipiar la segunda etapa, la de diagnósticu del estáu del edificiu.

Magar que les obres de restauración nun s’esperen hasta principios de 2021, el rector confía en qu’una parte de la nave pueda abrir al públicu en 2020, en lliturxes con una capacidá que va aumentar progresivamente según les posibilidaes.

Concretamente, Chauvet diz recibir la promesa de les autoridaes de qu’en cuanto la plaza de Notre Dame, conocida como Parvis, tea descontaminada de chombu, él y el so equipu van tar presentes con una copia de la Virxe de la Pilastra de Notre Dame p’acoyer a los visitantes.

  Categories: