L’Alministración vese obligada a cumplir los alcuerdos salariales

29 mayu 03:52 2009 Imprimir

<>El Conceyu por Otra Función Pública n´Asturies punxo esti día na conocencia de les organizaciones sindicales y del conxuntu de los trabayadores una comunicación na qu’asoleya como l’Alministración vese obligada a cumplir los alcuerdos salariales darréu de la sentencia recién qu’afita que nun se puen facer discriminaciones pente funcionarios de la mesma condición dientro de l’Alministración.

Nel BOPA d´ochu de marzu de 2007 espublízase l´Alcuerdu sobre Carrera y Desendolcu Profesional de los Emplegaos Públicos del Principáu d´Asturies, algamáu´l 27 d´avientu de 2006 ente l´Alministración y les Organizaciones Sindicales representaes na Mesa Xeneral de Negociación. Esti Alcuerdu, que tien caráuter normativu, refiérse esclusivamente al cumplimientu de requisitos d´esperiencia, como condición pa llevar a cabu´l pagu a cuenta, demientres se dispón del marcu normativu afayadizu. Asína lo señala la Sentencia 47/2009, de 22 de xineru de 2009, del Xulgáu de lo contencioso – alministrativu nº 5 d´Uviéu, na que s´afirma, además, que “la Administración abona el anticipo a título de “complemento de productividad por “incentivos al rendimiento” cuya naturaleza es distinta y distante de la encaminada a retribuir la carrera profesional, por lo que al aplicar anticipos sobre aquél complemento no cabe discriminar en atención a un sui generis procedimiento vinculado a la tan citada carrera profesional. Ninguna vinculación lógica ni legal puede establecerse entre complemento de productividad y complemento de carrera profesional, cada uno de los cuales cuenta con su respectivo fundamento, normativa y condiciones” Poro, el Xulgáu concluye que nun se pue facer discriminaciones pente funcionarios de la mesma condición dientro de l’Alministración. Lloñe d´acatar bonalmente esta Sentencia, que resuelve de manera xusta y exemplar el conflictu, l´Alministración del Principáu d´Asturies decidió recurrila en casación, allargando nel tiempu les discriminaciones salariales, nuna fuga p´alantre qu´abulta-y al Conceyu “impresentable”. Acordies colo espuesto, el Conceyu por Otra Función Pública n´Asturies pon na conocencia de les organizaciones sindicales y del conxuntu de los trabayadores les consideraciones que vienen darréu: 1ª La hipotética anulación xudicial de la convocatoria pa sumase a la mal nomada “carrera profesional” nun puede nin debe suponer la torna de dineru dalu per parte de los trabayadores. Nesti sen, refiértase que sigue plenamente vixente l´Acuerdu de 27 d´avientu de 2006, sobre la Carrera y Desendolcu Profesional de los Emplegaos Públicos del Principáu d´Asturies ( espublizáu nel suplementu del BOPA de 8 de marzu de 2007), qu´obliga al Gobiernu asturianu a pagar los importes del primer nivel, ensín falta d’apuntase a nada. 2ª Ye pernecesario reestablecer la igualdá salarial pente tolos emplegaos públicos, desaniciando les cafiantes discriminaciones que traxo la mentada resolución, de mou tal que l´Alministración pague les cantidaes debíes a los trabayadores que decidieron llibremente nun sumase a la convocatoria. Trátase de dar cumplimiento bonal a lo que yá tien reconocencia na sentencia nu 47/2009, del Xulgáu de lo Contencioso – Alministrativo nu 5 d´Uviéu, de 22 de xineru de 2009, que dexa claramente afitao que lo que ta pagando l´Alministración ye un “complementu de productividᔠque nada tien que ver cola carrera profesional. 3ª Pa ello, fai falta esixir a l´Alministración asturiana que retire darréu’l recursu de casación que presentó frente a la Sentencia nu 47/2009, del Xulgáu de lo Contencioso – Alministrativo nu 5 d´Uviéu, poniendo fin de manera xusta y definitiva al conflictu entamáu pola so esclusiva irresponsabilidá y foscura.

  Categories:
Loading Facebook Comments ...