L’Alla y Xixón van ellaborar midíes de dignificación social nel conceyu

L’Alla y Xixón van ellaborar midíes de dignificación social nel conceyu
31 ochobre 10:44 2019 Imprimir

L’Academia de la Llingua Asturiana aconceyó na mañana d’esti miércoles 30 d’ochobre cola Alcaldesa de Xixón y apautó con ella la ellaboración d’un protocolu de collaboración pa favorecer midíes de dignificación social del asturianu nel conceyu, y pa entamar proyectos concretos d’actuación conxunta y descentralizada que tengan a Xixón como centru d’actuación.

Esti miércoles, 30 d’ochobre, el Presidente de l’Academia de la Llingua Asturiana (ALLA), D. Xosé Antón González Riaño, y el representante de l’ALLA nel Conseyu Asesor de la Llingua del Conceyu de Xixón, l’académicu D. Pablo Xuan Manzano, aconceyaron cola Alcaldesa de Xixón, Dª. Ana González Rodríguez y col Conceyal d’Educación y Cultura, D. Alberto Ferrao Herrero.

Na xunta, fecha a pidimientu de l’ALLA, dambes instituciones pautaron la ellaboración d’un protocolu de collaboración col envís de trabayar a comuña pa favorecer les midíes de dignificación social del asturianu nel conceyu, asina como pa entamar proyeutos concretos d’actuación conxunta y descentralizada que tengan a Xixón como noyu central d’actuación. Asina mesmo, féxose un repasu y una bona valoración de les xeres llevaes alantre hasta agora pol consistoriu en rellación cola normalización social del asturianu y estudiáronse nueves propuestes pa desendolcar a lo llargo d’esta llexislatura.

Dende l’ALLA quier sorrayase lo positivo del aconceyamientu, tanto dende’l puntu de vista del perbón clima algamáu na mesma como na visión compartida de lo que’l conceyu de Xixón pue ufrir dende la perspeutiva recuperadora de la llingua y la cultura d’Asturies.

  Categories:
Loading Facebook Comments ...