L’Alla desenvuelve esti Payares les XXXVI Xornaes d’Estudiu

L’Alla desenvuelve esti Payares les XXXVI Xornaes d’Estudiu
20 ochobre 09:56 2017 Imprimir

L’Academia de la Llingua Asturiana vieno acabante d’asoleyar esti dia’l programa de les Xornaes que va organizar como tolos años del 7 al 9 del mes de Payares na Facuáltá de Filosofia y Lletres del campus delán Milán.

Les XXXIV Xornaes Internacionales d’Estudiu van celebrase como cada añu nel salón d’actos de la Facultá de Filosofía y Lletres y la inauguración va tener llugar el martes 7 a les 12 hores cola presentación de dos espublizaciones de l’Academia de la Llingua Asturiana, la edición dixital del “Lletres Asturianes 117” y el nuevu númberu de la revista dixital “Ciencies. Cartafueyos de Ciencia y Teunoloxía 7”, dixirida por Carlos Lastra.

Tres de la presentación entamarán les xornaes propiamente diches cola participación del académicu Francisco Llera Ramo (Universidá del País Vascu) que va facer la presentación en sociedá de la III Encuesta Sociolingüística de Asturias.

A les 16 hores va pronunciar Franck Floricic (Universidá Sorbonne Nouvelle-París) la ponencia “La negación en asturiano: comparación con otros idiomas románicos” y darréu va dase llectura a les comunicaciones del día: Severino Antuña González falará de la “Evolución de los estudios de toponimia centraos n’El Valle La Güeria Carrocera”;  Vicente Rodríguez Hevia de “La producción oral d ’Aurelín, el caberu poeta mineru”; Pablo Suárez García de “La interferencia léxica castellana nel asturianu normativu”; l’actor Carlos Alba «Cellero» de “Oralidá escénica: condicionantes prosódicos y sociollingüísticos”; y Rosabel San Segundo Cachero d’una “Ferramienta nuevo pa testos medievales”.

La Xornada finará a les 18,45 hores con una conferencia de  Juan José García González (Universidá d’Uviéu) sobro “La epigrafía romana del dominiu llingüísticu ástur: una revisión”.

El miércoles 8, les Xornaes entamarán otra vuelta a les cuatro la tarde con Sonia Barnes (Universidá de Marquette-USA) y la so ponencia “Un análisis acústico de la metafonía asturiana”. Tres del alderique, presentaránse les comunicaciones que vienen darréu: Florencio Friera falará de “Toponimia de pueblos nel Diccionario geográfico-histórico dirixíu por Martínez Marina”; Antón Caamaño dará “Una güeyada a la traducción al asturianu de testos dramáticos”; Xosé Nel Comba Paz presentaranos “La colección asturiana nel legáu bibliográficu del Príncipe Louis Lucien Bonaparte”; Xuan Xosé Lajo presentará los sos “Estudios sobre les llendes ástures y gallego-portugueses en Senabria”; y Carmen Muñiz Cachón falará de “Vocales asturianes: estabilidá de les átones finales”.Y tres de la posa vendrá la ponencia de Marcos Rodríguez Álvarez (Universidá d’Uviéu) “¡Bable nes escueles! Averamientu hestórico-políticu a la vindicación de la escolarización de la llingua asturiana”.

La xornada final del xueves 9 entamará a les 16 hores cola ponencia de Paquita Suárez Coalla (Borough of Manhattan Community College, New York-USA) “Averamientu a Crónica de la lluz y la solombra, d’Antón García, dende una perspectiva biocultural, pa siguir darréu con delles comunicaciones de Xulio Llaneza sobro “La toponimia de la collación casina de Caliao”; Xurde Fernández que fadrá un averamientu pa “Entamar a trabayar por proyectos na ESO”; Lluis Antón González Fernández de  Telón de Fondo que nos fadrá remebranza de “L’abegosu camín de la normalización del teatru n’asturianu”; Pablo A. Quiroga Prendes presentará “La opinión del profesoráu de Llingua Asturiana y Lliteratura n’Educación Primaria, Secundaria y Bachilleratu con rellación al usu de les TIC na so práctica docente” y Próspero Morán López presentará “Menextra: un modelu de sala de prensa virtual al serviciu de les llingües minoritaries”.

Tres la posa, la ponencia de Marta Fernández Morales (Universidá d’Uviéu) “Poucu, pero algu séi: Saberes femeninos y conciencia de xéneru en La mio vida ye una novela”pesllará les Xornaes d’esti añu.

Loading Facebook Comments ...