L’ALLA convoca la preba de conocencia de mayu

15 mayu 10:08 2015 Imprimir

Como davezu al averase’l branu de cada añu, esti 30 de mayu de 2015, l’Academia de la Llingua Asturiana va facer la segunda de les pruebes semestrales de conocencia de la llingua pa tolos interesaos n’amosar esa conocencia y poder acreditalo. El plazu de matrícula ye del 18 al 28 de mayu y l’horariu de matrícula va ser esos díes los llunes a xueves de 9 a 15 hores y de 16 a 19 y los vienres de 9 a 14.

A les persones declaraes aptes nesta prueba, l’Academia dará-yos un documentu onde s’afite la conocencia nel nivel 1 o básicu según calces siguíos por esta Institución y les persones que nun superen les pruebes del nivel 1 podrán presentase a nueves convocatories toles vegaes que-yos pruya.

Pal bon resultáu d’estes pruebes habrá tenese un dominiu básicu de la teoría gramatical del asturianu (conocencia y dominiu del funcionamientu gramatical del asturianu y de la normativa académica), de la práutica escrita (emplegu amañosu de la llingua, puestu en práutica gracies a exercicios gramaticales y de composición escrita), práutica oral (emplegu faláu de la llingua, nuna situación real o imaxinaria, que se va valorar nuna conversación colos miembros del xuráu calificador). Y tamién la conocencia del allugamientu de la llingua dientro de la sociedá asturiana asina como del procesu de normalización en que ta inxerta.

La prueba va tener dos partes, una escrita (dictáu, torna, exercicios gramaticales, redaición) y otra falada (conversación). Nota. Resulta imprescindible conocer les xeneralidaes gramaticales de la llingua asturiana y los aspeutos básicos de la so normativa ortográfica (Normes ortográfiques, ALLA, Uviéu, 2012, 7ª ed. revisada; Gramática de la Llingua Asturiana, ALLA, Uviéu, 2008, 3ª ed. reimpresión). Asina mesmo, aconséyase la llectura de testos fechos acordies cola normativa, como los asoleyaos por esta Academia.

  Categories: