L’alcordanza de Mánfer: “Héroes anónimos -La epopeya del sosuelu-“

¡Oh, Dioses del Olimpu!, echáime una gabita, que nun sé si yo solu podré tirar del carru y finar esta xera.

¡Oh, Muses del Parnasu!, sofitáime un migayu, que tamién a vosotres necesita na estaya esti humilde poeta.

¡Y a tí, hermanu Apolo!, acudo en tí enfotáu: Tú, que les ames tanto, inspira a les tos Muses, pa qu’elles m’inoculen el néutar del to numen.

Que voi narrar la síntesis d’una epopeya diaria que tán llibrando impávidos, nes coraes de la tierra, forníos topos humanos, los héroes anónimos, ¡los homes de la mina!

Yo baxé abondes vegaes a lo fondero del Tártaru (tercer rexón del Avernu), a u Plutón tien el so tronu atarraquináu solombres: espeu tros cadavéricos habitantes d’esi reinu.

Yo vime n’ocasiones escorríu poles Furies, que nun queríen dexame lluchar pola esistencia, que’l trabayu me daba,—a mí y a mio familia— allá abaxu nel fondu, onde elles s’erixíen de Dioses d’esi prediu.

Y en delles circunstancies, yo ablayáu, furando chipiteles perestrenchos, esbolígome al centru d’esi mundu, un mundu de materies minerales, baxu un cielo ensin sol y ensin estrelles, onde lo que camines ye a cencielles.

Y enrítense les Fíes de la Nueche, al ver que los humanos el so reinu, intenten invadir p’apoderase d’escomanaes riqueces qu’elles guarden. Y ordenen a la Parca que destruya al que tratare d’entrar dientru l’Arcanu.

Faciendo casu omisu de necies alvertencies, de pies nun montacargues, que baxa en vertical per tubu abovedáu revistíu de cementu, viaxo a la boca l’Orcu. Alluéu per prollongaes galeríes, de metálicos arcos reforzaes, o cuadros de madera bien encaxaos, penetro na morada de les dioses, esponiéndome impávidu, a les monstruoses artes yá emplegaes escontra otros collacios fenecíos: al barrenu qu’españa y t’invalida, al costeru traidor que t’estrapalla, o al argayu carbón de fría lava, que t’endolca na masa y te tapez. O a la invisible nube que mata silenciosa con ósidos durmientes, o a la muerte ruidosa con españíos tremendos del metanu prendíu, al mecese col aire, que con furia espantible retorcigaña o france los arcos o los cuadros, y les xugaes los tayos, na galería y na rampla, acabando nel intre con tola entibación y encelegaes y nuna quiebra ciega. Nesi apavoriáu instante too ye muerte y medrana, desolación y ruines en tola rodalada. Equí nun queda dalu requexu pal amor; equí nun hai afayu pa cantar poesía; equí nun queda nada prestoso pa la vida. Sólo queda un silenciu pa la tristura l’alma; sólo queda un espaciu pal duelgu y pa la murnia, pal lloru y… poco más.

Mas, comu la esistencia ye una llucha continua, colingáu n’estratos carboníferos, (fósiles arbolacios prehestóricos), y a traviés d’una viesca de mampostes, allá voi esmuciéndome na rampla, comu nun tobogán que m’empobina escontra d’un testeru d’oru prieto, ayalga rellumante na solombra. Esti ye’l mio destín. Y quiciabes, quiciabes, pue ser el mio afechar.

Y equí fina’l mio cantu, o más que cantu tartiu, ¡oh, Dioses del Olimpu!, ¡oh Muses del Parnasu!, y ¡oh, Apolo, bon hermanu!. Pa que s’enteren dellos —fabricantes de guerres— que nun son mester griesques ente pueblos hermanos, pos épiques batalles yá se llibren a diariu, nes coraes de la tierra, ente los elementos y los topos humanos, los héroes anónimos, ¡los homes de la mina!

(En Lletres asturianes, 40)