Portada Cooperación L’alcaldesa presentó’l Plan Estratéxicu del Voluntariáu d’Avilés

L’alcaldesa presentó’l Plan Estratéxicu del Voluntariáu d’Avilés

by redacción asturnews

Nun actu celebráu nel Centru de Servicios Universitarios la selmana pasada, l’alcaldesa presentó’l Plan Estratéxicu del Voluntariáu d’Avilés que recueye los oxetivos, ámbitos d’actuación y midíes de la estratexa ellaborada nos últimos meses por más de 60 persones y entidaes al traviés d’un procesu participativu.

L’alcaldesa, Mariví Monteserín, participó esta selmana pasada nel actu de presentación de les Estratexes Colectives d’Avilés para un Voluntariáu del sieglu XXI. Foi nun actu celebráu nel Centru de Servicios Universitarios nel que tamién intervinieron representantes de l’Asociación Los Glayus y persones que participaron en toles fases d’esti proyectu.

El documentu recueye los oxetivos, ámbitos d’actuación, midíes y responsables de la so execución que fueron consensuándose a lo llargo de les distintes fases d’ellaboración, nun procesu participativu que cuntó coles aportaciones de 60 persones y entidaes. Y na ellaboración d’esti Plan Estratéxicu del Voluntariáu d’Avilés túvose en cuenta la visión de les persones destinatarias del voluntariáu. Reconoz la importancia del voluntariáu de proximidá.

Na so intervención, Monteserín señaló qu’esti Plan “ye una oportunidá de crear nueves canales que, de forma coordinada coles alministraciones, les entidaes sociales y les persones, incentive y facilite l’actividá voluntaria, y qu’amás se convierta nun puntu d’alcuentru ente les persones receptores de l’actividá voluntaria y aquelles que se comprometen viviegamente nel llabor del voluntariáu.”

Amás, l’alcaldesa esplicó que “tenemos de dexar bien claro que l’Alministración tien la responsabilidá social, política y humana de responder a les necesidaes y demandes de la sociedá. De nenguna manera tendríamos de dexar en manos del voluntariáu la garantía de la igualdá d’oportunidaes nin el derechu de toles persones a tener accesu a unos servicios calidable. Somos conscientes de que ye un compromisu ineludible de los poderes públicos.”

Monteserín señaló qu’esti Plan de Voluntariáu “complementa’l llabor de les alministraciones” y tien como oxetivos “contribuyir a la sensibilización social y promoción del voluntariáu, afondar na capacitación y formación pa desenvolver la so función de manera más eficaz, y poner en marcha mecanismo por que la ciudadanía conoza meyor les diverses realidaes qu’esisten, por que se comprometa naquelles actividaes de voluntariáu que meyor s’afaigan a les sos preferencies o capacidaes”.

El Conceyu d’Avilés, al traviés de la Área de Participación Ciudadana, empezó’l mes de setiembre de 2017 una fase de reflexón y alderique ciudadanu pa disponer d’una estratexa compartida pal voluntariáu na ciudá. Mientres estos meses fuéronse asocediendo numberoses xuntes y xornaes de trabayu nes que participaron entidaes, persones voluntaries y destinatarias, amás de personal de diversos Servicios Municipales y d’otres Alministraciones Públiques.

Documentu disponible en: https://avilesparticipa.org/wp-content/uploads/2018/06/Documentu-final-rev-Com.pdf

Tamién te podria gustar