Portada Conceyos L’alcaldesa diz que Xixón va caltenese na puya pol grau de Deportes

L’alcaldesa diz que Xixón va caltenese na puya pol grau de Deportes

by redacción asturnews
Foto: Manuel (https://www.flickr.com/photos/martius/)

L’alcaldesa Ana González aseguró esta selmana que Xixón va caltenese na puya pol grau de Ciencies de l’Actividá Física y el Deporte y, por tanto, va sofitar la propuesta del equipu de gobiernu saliente de Foru que buscaba imponese a Mieres, Uviéu y Avilés con incentivos económicos a la Universidá d’Uviéu.

En concretu, plantegaba xubise en 250.000 euros, mientres cuatro años, l’aportación xixonesa al actual conveniu pol que’l Conceyu concede a la institución académica 524.000 euros al añu. González cavilgó que ye «importante» caltenese na reivindicación de nuevos títulos universitarios pa Xixón, porque «ye enriquecedor, da mayor potencia y abre posibilidaes». Sicasí, tamién recordó qu’a la fin quien tien que decidir ye’l rector.

Magar dexar claro que sofita traer el grau de Deportes al campus xixonés tamién esmució una alvertencia sobro l’escenariu que pueden atopase los xixoneses si’l proyectu local sale escoyíu: «Xixón tien bonos equipamientos deportivos, pero si la propuesta pa consiguir el grau pasa por vencer los a la Universidá, eso significa quitar a la ciudadanía, que se va quedar ensin ellos».

Per otra parte, avanzó que la próxima selmana va axuntar de nuevu con IX p’avanzar na forxa d’un programa de gobiernu conxuntu al traviés del analís d’un documentu de contraste estremáu en dos partes: coincidencies programátiques y aspeutos relevantes pa dambos onde nun hai unidá. La xunta con Podemos va ser yá en xunetu.

Tamién te podria gustar