L’alcaldesa defende’l calter integral y tresversal de la educación n’Avilés

L’alcaldesa d’Avilés defende’l calter integral y tresversal de la educación n’Avilés pol componente importante d’igualdá d’oportunidaes, d’inclusión social, y de participación que tienen les actuaciones educatives del Conceyu d’Avilés.

L’alcaldesa d’Avilés, Mariví Monteserín, participó nel XII Alcuentru Estatal de la Rede de Ciudaes Educadores (RECE) celebráu na localidá madrilana de Rivas sol títulu, “Ciudaes educadores: 25 años de compromisu cola igualdá d’oportunidaes”. Monteserín foi una de les ponentes de la mesa de diálogu d’alcaldes y ediles de Valencia, Avilés, Zaragoza, Granollers, San Sebastián, Málaga y Rivas

L’alcaldesa desplicó esti día qu’Avilés ta nesta rede dende l’añu 2000 y la participación supon un compromisu bien concretu cola educación: “Les nueses actuaciones educatives son integrales y tresversales, tienen un componente importante d’igualdá d’oportunidaes, d’inclusión social, y de participación de la comunidá educativa. Magar los retayos de l’alministración central en materia d’educación nun dexemos d’ocupanos de los proyectos educativos por responsabilidá pública y porque ye una de les nueses prioridaes”.

Na so intervención, Monteserín refiriose tamién  a la Llei pa la Racionalización y Sostenibilidá de les Alministraciones Públiques (RSAL) de la que dixo que  nun principiu foi esconcertante: “foi necesariu un analís fondu de cada actividá pa ver si’l so conteníu o finalidá correspondía a competencies municipales. A día de güei, les actividaes susceptibles de ser delegables son les que tán nel aire, en parte a la espera de que’l nuevu Gobiernu de la nación pronúnciese y decida sobre la LRSAL: si caltener, si abre una nueva moratoria o si directamente derogar. Al mio pensar, ye necesariu modificar o derogar la LRSAL, trabayar pa evitar duplicidades y, al empar, de maneta coordinada ya integral”.