L’alcaldesa d’Avilés anuncia “nueves fórmules” pa promover Planes d’Emplegu

L’alcaldesa d’Avilés, Mariví Monteserín, aseguró esta selmana pasada que’l Conceyu busca mecanismos y fórmules distintes a les aplicaes hasta’l momentu pa siguir poniendo en marcha planes d’empléu ensin correr riesgos xurídicos.

Mariví Monteserín aseguró esti día que “vamos atopar otros mecanismos distintos y más seguros xurídicamente pa siguir poniendo en marcha Planes d’Emplegu qu’ayuden a desaniciar a la situación de desemplegu de colectivos con especiales dificultaes pa la incorporación al mercáu llaboral, de mozos y de paraos de llarga duración”.

El Gobiernu local trata asina d’evitar fallos xudiciales como’l conocíu estos díes que conderga al Conceyu d’Avilés a convertir en trabayadora municipal indefinida a una de les persones beneficiaries del Plan d’Emplegu Local 2014-2015; hai otros dos causes relatives a este mesmu Plan pindios de fallu. Y hai otros conceyos con sentencies condenatorias en términos similares (Xixón y Uviéu).

Esta inseguridá xurídica foi la que llevó al Conceyu d’Avilés -y a otros como Llangréu y Mieres- a tomar la decisión de nun participar  na convocatoria del Plan d’Emplegu del Gobiernu d’Asturies d’anguaño, precisamente pa evitar esti tipu de fallos xudiciales que terminen incorporando a la plantiya municipal como personal llaboral non fixu a persones en situación de desempléu contrataes temporalmente per espaciu d’un añu.