L’alcalde d’Uviéu inaugura’l simposio internacional sobre’l Camín Primitivu

L’alcalde d’Uviéu inaugura’l simposio internacional sobre’l Camín Primitivu
14 xunetu 10:15 2016 Imprimir

L’alcalde d’Uviéu, Wenceslao López, inauguró esti miércoles na aula magna de la Universidá d’Uviéu’l simposio internacional sobre’l Camín Primitivu ‘Los Reis d’Asturies y los oríxenes del cultu a la tumba del apóstol Santiago’ que se celebra n’Uviéu hasta’l próximu sábadu.

Wenceslao López destacó que na última sesión plenaria, la Corporación municipal aprobó por unanimidá la adscripción d’Uviéu al Manifiestu del Camín Primitivu, “acotando’l nuesu compromisu a la recuperación, desenvolvimientu y divulgación d’esta Ruta”. El primer conceyal esplicó qu’en virtú d’esti alcuerdu, el Gobiernu del Principáu, al traviés de la Conseyería d’Educación, Cultura y  Deportes, y los conceyos d’Uviéu, Les Regueres, Grau, Salas, Tinéu, Ayande, Grandas de Salime, Fonsagra o Baleira, amás de munches asociaciones y colectivos d’Amigos del Camín, constituyeron la Mesa del Camín Primitivu, un preséu de xestión tresversal.

En palabres del alcalde, el simposio que vieno acabante entamar supon la reconciliación de la Historia con Uviéu yá que Conceyu y Universidá xuniéronse p’acoyer a grandes investigadores, referentes internacionales nel estudiu históricu, científicu y turísticu d’esta gran exa cultural, “que van apurrir les sos conocencies a esta ruta primixenia, un trazáu que tien munches singularidaes, tantes como significaos, los que-y dan los caminantes”.

Nel actu inaugural tamién participaron el presidente de la Fundación Municipal de Cultura y edil d’ésti área, Roberto Sánchez Ramos; el delegáu episcopal de Pelegrinaciones y Camín de Santiago de la diócesis d’Uviéu, Javier Suárez; la directora xeneral de Patrimoniu Cultural del Principáu, Otilia Requejo; la profesora titular d’Hestoria del Arte de la Universidá d’Uviéu, Raquel Alonso y el vicerrector d’Estensión Universitaria, Francisco José Borge López.

Sánchez Ramos defendió que’l Camín Primitivu ye un recursu económicu, hestóricu y turísticu de primer orde “pola so proyección tantu nacional como internacional.” El presidente de la Fundación Municipal de Cultura aprovechó la so vez d’intervención pa sorrayar qu’esti simposio forma parte del apueste estratéxicu” del Conceyu pel Camín Primitivu en xunto con otres alministraciones, conceyos vecinos ya inclusive de la provincia de Llugo y asociaciones amestaes a la ruta.

La profesora Raquel Alonso, organizadora del congresu xuntu al profesor Javier Fernández Conde, reconoció que pa ella ye un “prestu bien grande qu’esti proyectu se materializara a lo postrero y que lo fixera na nuesa alma mater, la Universidá d’Uviéu”. Coles mesmes, aplaudió la celebración del mesmu por afondar na conexón ente la investigación humanística, el serviciu social y el desenvolvimientu económico y turístico”.

 

  Categories: