L’actividá lectiva va siguir con normalidá n’Uviéu, Xixón y Avilés

La Conseyería d’Educación unvió a toles direcciones de los centros públicos, privaos y alcordaos un corréu nel que los comunica cómo afecten a la enseñanza les últimes midíes urxentes de prevención del coronavirus publicaes esta madrugada nel Boletín Oficial del Principáu (Bopa) y dexa afitao que l’actividá lectiva va siguir con normalidá n’Uviéu, Xixón y Avilés.

Amás, colgó nel portal de Educastur la información rellacionada col resolvimientu de la Conseyería de Salú, que, ente otres iniciatives, establez zarros perimetrales n’Uviéu, Xixón y Avilés, coles mires de prevenir a la comunidá educativa.

La circular roblada pola conseyera d’Educación, Carmen Suárez, esplica que l’actividá lectiva presencial caltendrase en tol Principáu y tamién nos trés conceyos citaos. Esto supon que ta dexada la movilidá d’entrada y salida d’Uviéu, Xixón y Avilés p’asistir a los centros d’enseñanza, incluyíes les escueles d’educación infantil.

Esti llunes, día 26 d’ochobre, tanto’l personal docente y non docente como l’alumnáu de les distintes enseñances pudieron siguir cola actividá llectiva habitual y realizar los desplazamientos que debíen. Nesa primer xornada, cada trabayador del sistema educativu portaba una declaración responsable na que figuraba’l nome del centru de destín.

La conseyería echó voz de a les direcciones qu’a lo llargo del llunes tienen de expedir certificaciones oficiales a tol personal docente y non docente que lo precise pa movese por motivu de residencia. Esi va ser el documentu con validez mientres duren les restricciones de movilidá.

Educación tamién treslladó toa esta información a les organizaciones sindicales.