L’aceite ye protagonista nes VIII Xornaes d’Alfarería d’Avilés

L’aceite ye’l filo conductor de les actividaes y eventos que componen el programa de les VIII Xornaes d’Alfarería d’Avilés, qu’arrincaron el xueves 7 d’abril, nel Palaciu de Valdecarzana y nel CMAE cola inauguración de la Iª Esposición Internacional d’Arte Postal n’Avilés “Aceite” y la esposición Alfarería Tradicional d’España: l’aceite, respectivamente, una cata d’aceite y una conferencia. Les dos esposiciones pueden visitase hasta’l 29 ( Palaciu de Camposagrado) y 30 d’abril, (CMAE), respectivamente.

La esposición consta de dos centenares d’obres postales provenientes de doce países (Alemaña, Brasil, Chile, Cuba, España, Estaos Xuníos, Francia, Inglaterra, Italia, Xapón, Portugal, Uruguai). El día de la inauguración celebrose una Cata d’aceite abierta al Publico nel Salón d’actos del Palaciu de Valdecarzana dirixida pol oleólogo Enrique Glera Martínez y probáronse trés aceites d’intensidaes distintes: una variedá nidia como ye la arbequina; una media, royuela y una fuerte, picual.

La esposición Alfarería Tradicional d’España: l’aceite, pue vese nel Centru Municipal d’Arte y Esposiciones (CMAE. C/Llanu Ponte, 49), hasta’l 30 d’abril, de llunes a sábados de 11 a 13 y de 18 a 21.00 hores.  Consta d’un centenar de vasíes orixinales de distintes dómines (sieglu XVII a XX) y llugares d’España, incluyíos Avilés (Miranda) y Uviéu (Faru) onde se fabricó esti tipu de recipiente venceyáu al aceite. Dende alcuzas o aceiteres, hasta cántaros de trasiegu, de midida, candiles o tinajas de purificación, almacenamientu o conserva de productos rellacionaos col aceite.

El corpus espositivu foi vencíu pa la esposición polos coleccionistes: Vicente Alvado (Alicante, unu de los mayores coleicionistes d’Europa), Rosá Carbellés (A Coruña), Colección Ágata &Paco (Madrid), Colección Tomás Rodríguez (Madrid), Colección A. Rubinos (Llugo), Colección Enrique Martínez Glera (Logroño), otros coleccionistes que prefieren permanecer nel anonimatu y fondos de ANMinvestigación. Toos ellos, salvu Vicente Alvado, van asistir a la inauguración.

Completen la esposición 30 fotografíes impreses en gran formatu y sobre divond HD coles que pretende facilitase la comunicación ente vasía espectador y usu.