L’Academia Sueca va apurrir dos premios Nobel de Lliteratura anguaño

L’Academia Sueca va apurrir dos premios Nobel de Lliteratura anguaño
07 marzu 09:51 2019 Imprimir

L’Academia Sueca va apurrir do Nobel de Lliteratura en 2019, unu correspondiente a anguaño y otru al aplazáu en 2018 pol escándalu de filtraciones y abusos na institución, sigún confirmó esta selmana’l so secretariu provisional, Anders Olsson.

“Va Haber dos premios Nobel como esperábamos, tamién se va fallar el premiu reserváu al añu pasáu”, declaró Olsson a la edición dixital del periódicu “Dagens Nyheter”, principal diariu suecu, al términu d’una xunta de la xunta directiva de la Fundación Nobel.

L’academia anunciara en mayu l’aplazamientu del Nobel de Lliteratura, daqué que nun se producía dende va siete décades, pola perda de “enfotu” del mundu esterior na mesma institución, por cuenta de la crisis que provocó l’arrenunciu de media docena de miembros.

La institución qu’otorga cada añu’l premiu amosara entós la so intención d’apurrir dos en 2019, anque la decisión final quedaba en manos de la Fundación Nobel, qu’esixía reformes nel funcionamientu de l’academia para aceptar esa solución. “Toi bien contentu por recibir esi mensaxe güei, qu’implica tamién que vamos poder trabayar con tranquilidá colos premios y que tolos miembros del Comité Nobel van tar más motivaos para ese trabayo”, dixo Olsson a l’axencia sueca TT.

Dieciocho muyeres denunciaron en payares de 2017 en “Dagens Nyheter” abusos d’una “personalidá cultural” próxima a l’Academia Sueca, depués identificada como l’artista francés Jean-Claude Arnault, maríu de la poetisa y académica Katarina Frostenson. La institución cortó la relación y encargó una auditoría, que concluyó que se produxeren filtraciones y que’l sofitu económicu recibíu pol club lliterariu que dirixía Arnault incumplía les riegles d’imparcialidá al ser la so esposa copropietaria.

El desalcuerdu sobro les midíes que teníen de tomase y la situación de Frostenson desencadenaron xuna folada d’arrenuncios, intercambiu d’acusaciones ente dos bandos engarraos y l’aplazamientu per primer vegada en siete décades de la entrega del Nobel de Lliteratura.

Ente quien dexaron la institución figura la so entós secretaria permanente, Sara Danius, que la selmana pasada anunció la so salida definitiva diez meses dempués d’abandonar el puestu.

L’Academia Sueca impulsó nos últimos meses delles reformes de los sos estatutos y escoyó a cinco nuevos miembros. Arnault foi condergáu n’avientu pol Tribunal d’Apelación d’Estocolmo a dos años y mediu de cárcel por dos casos de violación d’una muyer n’ochobre de 2011, anque apeló al Supremu.

  Categories: