L’Academia Sueca incorpora a una poetisa pa la vacante del escándalu

by redacción asturnews | febrero 19, 2019 9:45 am

L’Academia Sueca anunció esti martes l’ingresu de la poetisa Tua Forsström na institución qu’otorga cada añu’l Nobel de Lliteratura y que traviesa la peor crisis de la so hestoria por un escándalu sexual y de filtraciones.

Forsström va ocupar l’asientu númberu 18, qu’abandonó’l mes pasáu la tamién poetisa Katarina Frostenson n’algamando un alcuerdu cola Academia, que-y va dar una asignación económica mensual en cuenta de el so arrenunciu voluntariu.

Un informe encargáu pola institución concluyera que la espulsión de Frostenson taba xustificada por haber frayao los estatutos al penerar al so maríu, l’artista francés Jean-Claude Arnault, los ganadores del Nobel y diversos nomamientos.

Seis académicos dexaron la institución dende abril, mientres dos tornaron a l’actividá y almitióse a cinco nuevos, polo qu’agora tán ocupaos dieciséis de los dieciocho asientos. Queda por resolver la situación de la exsecretaria Sara Danius, qu’entá nun esclarió si torna a l’Academia. L’ingresu de Forsström -que pertenez a la minoría sueca de Finlandia- nun se va formalizar hasta la próxima asamblea añal, que se va celebrar el 20 d’avientu.

L’orixe del casu son les denuncies por abusu sexual feches en payares de 2017 en Dagens Nyheter, el principal diariu suecu, por 18 muyeres contra una “personalidá cultural” bien próxima a l’Academia, depués identificada como Jean-Claude Arnault.

La institución cortó la relación y encargó una auditoría, que concluyó la pasada primavera que se produxeren filtraciones y que’l sofitu económicu recibíu de l’Academia pol so club lliterariu incumplía les riegles d’imparcialidá al ser la esposa de Arnault copropietaria y miembru de la institución. El desalcuerdu sobro les midíes a tomar y sobro la situación de Frostenson desencadenó la folada d’arrenuncios y l’aplazamientu per primer vegada en siete décades de la entrega del Nobel de Lliteratura.

Source URL: http://asturnews.com/lacademia-sueca-incorpora-a-una-poetisa-pa-la-vacante-del-escandalu/