Portada Educación L’Academia, sindicatos y padres esixen respetu pala Llingua na Llei Wert nun comunicáu conxuntu

L’Academia, sindicatos y padres esixen respetu pala Llingua na Llei Wert nun comunicáu conxuntu

by asturnet

L’Academia de la Llingua Asturiana, los Sindicatos de la Enseñanza SUATEA, FETE-UXT y CC.OO., el Sindicatu d’Estudiantes y les organizaciones de padres d’alumnos FAPA Miguel Virgós y FAPAS-Xixón dieron conxuntamente esti martes una rueda de prensa énte la grave situación na que quedaría la enseñanza de l’asignatura de Llingua Asturiana na Educación Primaria y Secundaria n’Asturies cola implantación de la LOMCE (Ley Orgánica de Mejora de la Calidad Educativa) popularmente denomada «llei Wert». Na sée de l’Academia, toes les tres partes esixeron, col mayor puxu, respetu pala Llingua na Llei Wert, calteniendo como mínimu l’estatus que tien de voluntariedá na enseñanza primaria.

El problema que xurde otra vuelta na enseñanza voluntaria del Asturianu, ye que se quier xeneralizar el modelu de optatividá que se ta aplicando na enseñanza secundaria y que nun cumple’l mandatu de la LLei d’Uso: Ufiertar l’asturianu como optativa a escoyer frente al Francés y otres llingües estranxeres y non a escoyer con Cultura Asturiana como en primaria hasta agora.

Poner a competir al asturianu col Francés o cualaquier otra llingua d’un estáu de la UE sedría condergala, y separtar la cultura de nueso del currículu, como davezu atalanta la comunidá comunicativa qu’asocedería.

La Rueda de Prensa entamó cola llectura pola Presidenta de l’Academia de la LLingua, Ana Cano, d’un comunicáu que llevaba por títulu: “El futuru de la Llingua Asturiana acordies cola “llei Wert” y les reclamaciones de la comunidá educativa asturiana”.

Con fecha 17 d’avientu de 2013 l’ Academia de la Llingua Asturiana alvertía a la opinión pública del peligru que corría la enseñanza del asturianu si nun se contemplaba una correición amañosa del articuláu de la LOMCE (Llei Orgánica de Meyora de la Calidá Educativa), popularmente denomada «Llei Wert», que plantega’l Gobiernu del Partíu Popular (PP) en Madrid. L’ Academia facía, amás, un llamáu al Gobiernu del Principáu d’ Asturies pa que tomare nes sos manes la esixencia d’una solución definitiva a los problemes d’escolarización de la Llingua Asturiana.

De mou parale1u, otres instancies y organizaciones (como los Sindicatos d’Enseñanza SUATEA, CC.OO. y FETE-UXT), el Sindicatu d’Estudiantes y organizaciones de padres d’a1umnos como FAPA Miguel Virgós y FAPAS-Xixón llevantaben la voz pa pidir col mayor enfotu que la futura Llei d’Educación nun fuere l’elementu que llevare a la desapaición de la nuesa llingua história, sinón que, a la es contra, ficiere vidable un futuru dignu pa la so esco1arización, entamada va cuasi 30 años.

Pues bien, ye decisión de l’Academia, de los sindicatos y de les organizaciones de padres y alumnos, sigún asoleyen nesti comunicáu, “collaborar axuntando esfuerzos pa treslladar el Partíu Popular, a los Gobiernos d’España y d’ Asturies, a les fuerces polítiques de la Xunta Xenera1 ya to1 pueblu asturianu la so esmolición y esixencia d’una solución efeutiva pa la esco1arización del asturianu. Nós nun representamos a tola sociedá asturiana, pero somos una parte importante de la comunidá educativa asturiana y queremos que se nos sienta nunos momentos que puen ser decisivos pa la sobrevivencia de la llingua y cultura d’ Asturies. Somos sabedores qu’estos y otros problemes (emplegu de la llingua na alministración, nos medios de comunicación públicos,na toponimia, etc) tienen el so orixe na falta de reconocimientu xurídicu del asturianu como llingua oficial; poro, reclamamos esi estatus xurídicu d’oficialidá, entendiendo qu’ésta ha afayase a la realidá social y económica d’ Asturies y teniendo tamién en cuenta la nuesa tradición cultural y sociollingüística. Reclamamos, en definitiva, un consensu políticu ampliu que defina les carauterístiques qu’ha tener la oficialización de la llingua, les sos fases d’aplicación y los recursos que, acordies cola situación de crisis que nos llenda, puen destinase a esti fin”.

Pero esixen también, y col mayor puxu, que “los redactores de la «Llei Wert» seyan conscientes de qu’ Asturies tien una llingua propia que, magar nun ser llingua co-oficial, sí tien reconocimientu xurídicu como llingua, amás de plenu calter curricu1ar y que vien siendo estudiada con procuru por miles d’a1umnos asturianos a lo llargo de les 3 últimes décades. Los redactores de la llei tienen que saber esto y tienen qu’actuar en consecuencia, ye dicir, faciendo porque la escolarización de la llingua asturiana s’allugue con xeitu alllau del restu de les aries llingüístiques”.

Pa l’Academia y les organizaciones “ye inalmisible cualquier tratamientu Ilegal que rebaxe l’ actual estatus escolar del asturianu. Ésti tendría, mesmamente, que meyorase n’aspeutos como’l númberu d’hores d’impartición, calter del aria (especialidá pal profesoráu de primaria y secundaria), xeneralización a tolos centros,etc”.

El comunicáu fina diciendo que “nós, como institución y organizaciones esmolecíes pol futuru d’ Asturies -y tamién como persones asturianes- taremos sollertes pa facer un siguimientu de la situación y comprometémosnos a facer oyer la nuesa voz ellí onde seya necesario”.

Tamién te podria gustar